«Առաջին լրատվական»-ի տեղեկություններով՝ երեկ երեկոյան «Նուբարաշեն» ՔԿՀ-ից ազատ է արձակվել հարկային պարտավորություններից խուսափելու համար կալանավորված նախկին պատգամավոր, գործարար Հակոբ Հակոբյանը՝ Ճոյտը:
Նրա խափանման միջոց կալանքը փոխարինվել է չհեռանալու մասին ստորագրությամբ:
Հակոբյանի պաշտպան Կարեն Սարդարյանն «Առաջին լրատվական»-ի հետ զրույցում հաստատեց տեղեկությունը՝ հավելելով, որ համապատասխան միջնորդությամբ իրենք էին դիմել, և նախաքննական մարմինը հաշվի առնելով նաև Հակոբյանի առողջական վիճակը՝ գտել է, որ նրան կալանքի տակ պահելու հիմքեր այլևս չկան: Ինչ վերաբերում է մեղադրանքին, ապա փաստաբանն ասաց, որ մեղադրանքը շարունակում է նույնը մնալ, որևէ բան չի փոխվել, իսկ Հակոբյանը շարունակում է իրեն մեղավոր չճանաչել առաջադրված մեղադրանքում:
Փաստաբանը նաև նշեց, որ Հակոբ Հակոբյանի առողջական վիճակը լավ չէ և հրատապ բուժման կարիք ունի:
Հիշեցնենք, որ Հակոբ Հակոբյանը ձերբակալվել էր փետրվարի 2-ին՝ ֆինանսների նախարարության քննչական ծառայության վարույթում քննվող քրեական գործի շրջանակներում: Նա մեղադրվում է պետությանը խոշոր վնաս պատճառելով ապօրինի ձեռնարկատիրության և գանձվող հարկերը, տուրքերը կամ այլ պարտադիր վճարումները վճարելուց խուսափելու մեջ:
Հիշեցնենք նաև, որ նախկին պատգամավորը իր կալանքը կրում էր ՀԽ անդամ Գարեգին Չուքասզյանի հետ նույն խցում: Գարեգին Չուքասզյանը երեկ ևս ազատ է արձակվել: