Երեկ Երևանում տեղի ունեցան սգո միջոցառումներ՝ նվիրված Թուրքիայում Հայոց ցեղասպանության 100-ամյա տարելիցին: Ռուսաստանը միջոցառումներին ներկայացնում էր ՌԴ նախագահ Վլադիմիր Պուտինը, որը տվյալ դեպքում համակարծիք էր համաշխարհային հասարակական կարծիքի հետ, որը դատապարտում է հանցագործությունը, գրում է Gazeta.ru-ն:
Դրա հետ միասին, Ռուսաստանի բարձրաստիճան մեկ այլ ներկայացուցիչ այդ օրը եղել է Թուրքիայում, որը մինչ օրս չի ճանաչում Ցեղասպանությունը ու տոնում է սեփական հիշատակության օրը: Մոսկվան փորձում է լողալ երկու երկրների միջև ու բավական հաջող կերպով:
Այդքան բարձրաստիճան հյուրեր, որքան Հայաստան էին ժամանել Ցեղասպանության 100-ամյա տարելիցի օրերին, Երևանը հավանաբար չէր ընդունել: Երևան էին ժամանել ՌԴ նախագահ Վլադիմիր Պուտինը, Ֆրանսիայի նախագահ Ֆրանսուա Օլանդը, Սերբիայի նախագհ Տոմիսլավ Նիկոլիչը ու Կիպրոսի նախագահ Նիկա Անաստասիադիսը, տարբեր արտասահմանյան երկրների պատվիրակություններ:
Հայաստանը վաղուց էր պատրաստվում 100-ամյակի միջոցառումներին: Այս շաբաթ Երևանում էին ամբողջ աշխարհից հայկական համայնքի հայտնի ներկայացուցիչներ: Ավելի վաղ Երևան ժամանեց Քիմ Քարդաշյանն ամուսնու՝ Քանյե Ուեսթի հետ, հետո նաև System of a Down խումբը:
«Մենք անկեղծորեն ցավակցություն ենք հայտնում հայ ժողովրդին, որ ապրել է մարդկության պատմության մեջ ամենասարսափելի ողբերգություններից մեկը: Ավելի քան 600 հազար մարդ քշվել է իրենց հայրենի տներից, ենթարկվել զանգվածային բռնաճնշումների: 1915թ. իրադարձությունները ցնցել էին ամբողջ աշխարհը, ու Ռուսաստանը դա ընդունել է որպես սեփական վիշտ»,- ասել է Պուտինն իր ելույթում:
Ռուսաստանը ճանաչում է Ցեղասպանությունը, գրում է Gazeta.ru-ն, սակայն Թուրքիայի հետ սերտ տնտեսական հարաբերությունների հետևանքով, որոնք ակտիվորեն զարգանում են վերջին շրջանում, ձգտում է խուսանավել այդ հարցում:
Անկարայի ռեակցիան մեղմելու համար Պետդումայի խոսնակ Նարիշկինը Պուտինի այցին զուգահեռ մեկնել էր Անկարա: