«Սա շատ հզոր ֆորում է, շատ երկրների խորհրդարանի ներկայացուցիչներ ու մասնագետներ են այստեղ եկել: Դուք գիտեք մեր՝ ֆրանսիացիների վերաբերմունքը ցեղասպանությունների վերաբերյալ, և մենք համոզված ենք, որ բոլորն էլ աստիճանաբար կմտածեն այնպես, ինչպես մենք ենք մտածում»,- «Առաջին լրատվական»-ի հետ զրույցում ասաց Ֆրանսիա-Հայաստան բարեկամության շրջանակի նախագահ Ֆրանսուա Ռոշբլուանը:
Վերջինս վստահ է, որ Հռոմի պապ Ֆրանցիսկոսի հայտարարությունը մի նոր և շատ կարևոր սկիզբ է, մի նոր քայլ է Հայոց ցեղասպանության ճանաչման գործընթացում: «Եվ շատ կարևոր է, որ Գերմանիան հնչեցրեց Ցեղասպանություն բառը: Ես ափսոսում եմ, որ Թուրքիան կրկին չի ընդունում Ցեղասպանության իրողությունը։ Ամբողջ աշխարհն է այն արդեն ընդունում: Եվ զանգն արդեն հնչել է, այդ երկիրը պետք է հետևություն անի: Ի վերջո մի օր Թուրքիան էլ է ճանաչելու Հայոց ցեղասպանությունը»,- ասում է նա:
Ֆ.Ռոշբլուանի կարծիքով հայ-թուրքական արձանագրությունները շատ կարևոր փաստաթղթեր էին, բայց «ցավոք, Ադրբեջանի ճնշումների արդյունքում Թուրքիան չընդունեց դրանք»: «Հայ-թուրքական սահմանի խնդրի լուծումը Թուրքիայի և Հայաստանի ձեռքում էր, բայց այդ երկու երկրների խորհրդարաններն այդ արձանագրությունների նկատմամբ տարբեր վերաբերմունք ունեին: Ադրբեջանը ճնշեց Թուրքիային և այդ երկրի խորհրդարանը չվավերացրեց արձանագրությունները»,- ասում է ֆրանսիացի գործիչը:
Ֆ.Ռոշբլուանը նաև տեղեկացրեց, որ 1990 թվականից սկսած արդեն 29-րդ այցելությունն է Հայաստան: Իսկ եկող շաբաթ նա գնալու է Ղարաբաղ՝ հետևելու խորհրդարանական ընտրություններին:
Հ.Գ. Ֆ.Ռոշբլուանի հետ հարցազրույցը լրագրողների խնդրանքով ֆրանսերենից թարգմանեց ԱԺ ՀՀԿ խմբակցության պատգամավոր Մարգարիտա Եսայանը:
