«Առաջին լրատվական»-ի զրուցակիցն է ԱԺ ՀՀԿ խմբակցության քարտուղար Գագիկ Մելիքյանը:
– Պարոն Մելիքյան, Հիմնադիր խորհրդարանի անդամներին բերման են ենթարկել, խուզարկություն են սկսել նրանց գրասենյակներում՝ Երևանում և Վանաձորում: Ինչպե՞ս եք մեկնաբանում այս երևույթները: Արդյոք սրանք ինքնադրսևորման ազատության խոչընդոտներ չե՞ն իշխանության կողմից:
– Կարծում եմ՝ ոչ: Կարծում եմ, որ այն վարքագիծը, որ դրսևորում էր Հիմնադիր խորհրդարանը՝ իր ղեկավարի հետ միասին, վաղ թե ուշ նման վերաբերմունքի պետք է արժանանար:
– Ի՞նչ վարքագիծ:
– Այն վարքագիծը, որ հակաժողովրդական հայտարարություններ անելը, հակապետական հայտարարություններ անելը, Ցեղասպանության 100-րդ տարելիցի հետ կապված միջոցառումները խաթարելը: Կարծում եմ, որ այս բոլորը իրոք նման վերաբերմունքի պետք է արժանանան ոչ միայն իշխանությունների, իրավապահների կողմից, այլև ամբողջ ժողովրդի կողմից: Ես համոզված եմ, որ ժողովրդի բացարձակ մեծամասնությունը այս քայլերը դրական կգնահատեն, համարում եմ նույնիսկ ուշացած քայլ:
– Ինչո՞ւ հակաժողովրդական: Նրանց հայտարարությունները հիմնականում հակաիշխանական են:
– Չեմ կարծում, որ նրանց հայտարարությունները միայն հակաիշխանական կամ հակապետական էին, դրանք ամբողջությամբ նաև հակաժողովրդական էին:
– Օրինակ՝ ո՞ր հայտարարությունն էր հակաժողովրդական, կարո՞ղ եք նշել:
– Օրինակ՝ այն հայտարարությունը, որ ապրիլի 24-ին՝ Ցեղասպանության 100-րդ տարելիցի նույն օրը, իրենք անհանդուրժողականության կոչեր են հնչեցնելու՝ այն դեպքում, երբ ժողովուրդն ամբողջությամբ այդ օրը նվիրելու է Ցեղասպանության 100-րդ տարելիցը նշելուն: