Օխոտի ծովում՝ Մագադանից 300 կմ հեռավորության վրա, չորեքշաբթի լույս հինգշաբթի գիշերը խորտակվել է «Հեռավոր Արևելք» ձկնորսանավը: Նավում եղել է 132 մարդ: Հաղորդվում է, որ զոհվել է անձնակազմի 54 անդամ: Այս մասին գրում է BBC-ն:
Հայտնի է, որ հաջողվել է փրկել 63 մարդու, ևս 15-ի ճակատագիրն անհայտ է:
Այդ շրջանում ջրի ջերմաստիճանը զրո աստիճան է:
«Փրկարարական գործողությանը մասնակցող ձկնորսական նավերը բարձրացրել են 54 մարդու մարմին, 63-ը փրկվել են»,- ասվում է հաղորդագրությունում:
«Հեռավոր Արևելք» նավում եղել են 54 օտարերկրացիներ, 42-ը՝ Բիրմայի քաղաքացիներ, 3-ը՝ Լիտվայի, 4-ը՝ Ուկրաինայի և 5-ը՝ Վանուատուի, իսկ մնացած 78-ը եղել են ռուսներ։
Ինչպես հաղորդվում է, ձկնորսանավը չի հասցրել ուղարկել SOS ազդանշան, քանի որ այն շատ արագ է խորտակվել։:
Աղետի պատճառները դեռևս անհայտ են: Հնարավոր է՝ նավը խորտակվել է մեքենայական բաժնում ջուր լցվելու պատճառով: Բացառված չէ նաև, որ նավը խախտել է անվտանգության կանոնները՝ գերազանցելով բեռի պահպանման թույլատրելի ծավալը:
