Հարավկորեական LG ընկերությունն ապրիլի 28-ին և 29-ին պատրաստվում է ներկայացնել իր հաջորդ ֆլագմանական սմարթֆոնը՝ G4-ը: Այս մասին հայտնում է The Verge պարբերականը, որն ընկերության առաջիկա միջոցառման հրավեր է ստացել:
Շնորհանդեսը տեղի կունենա աշխարհի մի քանի քաղաքներում՝ Նյու Յորքում, Լոնդոնում, Փարիզում, Սեուլում, Սինգապուրում և Ստամբուլում:
Ավելի վաղ համացանցում հայտնվել են լուսանկարներ՝ ենթադրաբար, LG-ի ապագա ֆլագմանի: Այսպես` սմարթֆոնը ձևով հիշեցնում է նախորդը` G3-ը: Լուսանկարներից դատելով՝ նաև կարելի է ասել, որ գաջետի վրա սլաքի համար անցք է ստեղծվել: Ըստ այլ վարկածի՝ այդ տեղը կարող է նախատեսված լինել հեռուստատեսային ալեհավաքի համար: Բացի դրանից՝ դատելով էկրանի լուսանկարներից, սմարթֆոնը կաշխատի Android 5.0.2 օպերացիոն համակարգով:
Արևմտյան ԶԼՄ-ների տեղեկությամբ՝ G4-ը 5,5-դյույմանոց QHD դիսփլեյ կունենա: Սարքը կունենա Qualcomm Snapdragon 808 պրոցեսոր, 3 գիգաբայթ օպերատիվ հիշողություն և 32 գիգաբայթ` ֆայլեր պահելու համար: Հիմնական տեսակցիկը կլինի 16-մեգապիքսելանոց, դիմայինը՝ 8-մեգապիքսելանոց:
