Մի քանի օրից՝ ապրիլի 10-ին, նախատեսված է Գագիկ Ծառուկյանին պատկանող Աբովյանի շուկայի բացումը, որտեղ պետք է հանգրվանեն «Հրազդան» տովավաճառի այն առևտրականները, ովքեր դժգոհ են շուկայի սեփականատեր, ԱԺ ՀՀԿ-ական պատգամավոր Աշոտ Աղաբաբյանի գնային քաղաքականությունից:
Հիշեցնենք, որ այս աղմուկը բարձրացավ տարեսկզբին, երբ դոլար-դրամ տատանումների ֆոնին Աշոտ Աղաբաբյանը որոշեց բարձրացնել տաղավարների վարձավճարները: Դրանից դժգոհ առևտրականները գնացին Ծառուկյանի մոտ` օգնության խնդրանքով: Նա էլ խոստացավ Աբովյան քաղաքին կից շուկայի տարածքը վերանորոգել, անվճար շինանյութ եւ 1000 տոննա ցեմենտ տրամադրել, որպեսզի առևտրականներն իրենց համար տաղավարներ կառուցեն: Բացի դրանից` Ծառուկյանը խոստացել էր, որ այդ տարածքը առևտրականներին կտրվի անվճար հիմունքներով, համենայն դեպս, 2-3 տարի նրանցից տաղավարների վարձավճարներ չեն գանձվի: «Ես պատրաստ եմ տրամադրել տարածքը առանց որեւէ գումարի: Երբ որ դուք կաշխատեք՝ դա կլինի 1 տարի, 2, 3, 4 տարի, երբ ձեր վիճակը կլավանա, ես դեմ չեմ, որ, ասենք, 300 դոլար վճարեք: Բայց դա կլինի այն ժամանակ, երբ դուք վճարունակ կլինեք: Բայց հիմա ես ձեզ ասում եմ, որ տարածքը տրամադրում եմ, ախռանա ծառայությունը ես եմ դնելու, ինչ որ պետք է կանեմ, կվերանորոգեմ, իսկ մնացածը դուք աշխատեք` մինչև մի բան կլինի»,- հունվարի վերջին ասել էր Ծառուկյանը:
«Առաջին լրատվական»-ի տեղեկութուններով, սակայն, այս տաղավարների շինարարությունը առևտրականների վրա շատ թանկ է նստել` մոտ 1 միլիոն դրամ: Սկզբում յուրաքանչյուրից 400 հազար դրամ են հավաքել տաղավարների նորոգման համար, ապա ավելի ուշ կրկին գումար են պահանջել՝ նշելով, որ հավաքվածը բավարար չի եղել: Արդյունքում` յուրաքանչյուր առևտրականից 1 միլիոնից ավելի գումար է գանձվել, բայց առևտրականները հետաքրքիր փաստի առաջ են կանգնել. նրանք վստահ են, որ նշված տարածքում իրենք չեն կարող առևտուր անել: Դա մարդաշատ վայր չէ, իրենց մշտական հաճախորդներն էլ տարիներ շարունակ սովոր էին իրենց հետ աշխատել «Հրազդան» տոնավաճառում: Հասկանալով, որ առանձնապես հաջողության չեն հասնելու Աբովյանում, շատերը ցանկացել են իրենց գումարները հետ ստանալ, սակայն նրանց ասվել է, որ դա հնարավոր չէ:
«Մենք «Հրազդան» տոնավաճառի տիրոջից ժամանակին խնդրում էինք տաղավարների վարձավճարները իջեցնել, որ մենք ուրիշ տեղ չտեղափոխվենք, բայց այդ պահին չիջեցվեց: Իսկ հետո իջեցվեց, բայց մենք այդտեղ արդեն գումար ենք ներդրել, տաղավարներ ենք վերցրել ու հիմա չգիտենք` ոնց անենք: Մնացել ենք երկու քարի արանքում»,-«Առաջին լրատվական»-ի հետ զրույցում ասաց տոնավաճառի աշխատակիցներից մեկը՝ մանրամասնելով, որ Ծառուկյանից մոտ 500 հոգի այդպիսի տաղավարներ է վերցրել: «Այդ 500 հոգիս միլիոնից ավելի գումար ենք դրել: Տնից-տեղից կտրել ենք, պարտքով վերցրել ենք, տաղավարներ են պատրաստել, ու հիմա ոնց չգնանք: Բոլորն էլ գնալու են, որովհետև մեր փողերը հետ չեն տա, եթե չգնանք: Ո՞վ կտա մեզ էդ ներդրած գումարը, եթե մենք չգնանք: Սա է մեր վիճակը: Հուսահատված սպասում ենք»,- ավելացրեց առևտրական կինը:
Ընդ որում` արդեն շշուկներ են պտտվում, որ տաղավարները հենց առաջին օրվանից էլ վճարովի են լինելու: Ճիշտ է, սկզբում դա սիմվոլիկ գումար կլինի, սակայն հետո այն չի զիջի երևանյան և ոչ մի տոնավաճառի վարձավճարին: Իսկ սա բացատրվում է նրանով, որ Ծառուկյանն այլևս քաղաքական գործիչ չէ, քաղաքական նկրտումներ այլևս չունի և նրա համար բացարձակապես միևնույն է` որքանով են վճարունակ առևտրականները: Նա այլևս խաղում է բացառապես բիզնեսի կանոններով: