Ապրիլի 25-ին Հայոց ցեղասպանության 100-րդ տարելիցի առիթով «Հեռանկարներ» համույթը Նյու Յորքի Սուրբ Հովհաննես տաճարի հետ համագործակցությամբ կներկայացնի մեկժամյա համերգ՝ հայկական դասական, գյուղական երաժշտությամբ և շարականներով։ Համերգը կարտացոլի հայկական մշակույթի գեղեցկությունն ու տոկունությունը՝ փոխանցում է Armenian Weekly-ն։
Համերգին կմասնակցեն «Զուլալ» ակապելլա տրիոն՝ Թենի Ապելյանը, Երազ Մեշչյանը և Անաիս Թեքերյանը, ինչպես նաև «Հեռանկարներ» համույթի տավիղահար Ալիսա Ռեյթն ու ֆլեյտահար, գեղարվեստական տնօրեն Սաթո Մուղալյանը։ Համերգը, որը հանրության համար կլինի բաց և անվճար, կկայանա Սուրբ Հովհաննես մայր տաճարում։
Համերգը կնշանավորի նաև «Հեռանկարների» երկրորդ օրորոցային CD-ի թողարկումը՝ նվիրված Ցեղասպանության զոհերին։