Ամերիկացի կինոդերասան Հարիսոն Ֆորդը վնասվածքներ է ստացել սեփական ինքնաթիռի վթարային վայրէջքի ժամանակ: Նշվում է, որ թեթևշարժիչային ինքնաթիռը, որի օդաչուն հենց դերասանն է եղել, վայրէջք է կատարել Լոս Անջելեսում՝ գոլֆի դաշտում: Այս մասին գրում է BBC-ն՝ վկայակոչելով տեղի ԶԼՄ-ներին:
Նշվում է, որ թռիչքից հետո օդաչուն կապվել է տեղի օդանավակայաններից մեկի հետ և հայտնել, որ ինքնաթիռը շարժիչի հետ կապված խնդիրներ ունի: Լոս Անջելեսի հրշեջ ծառայության տվյալներով՝ վայրէջքից հետո օդաչուն ողջ էր և գիտակից վիճակում: Նրա անունը պաշտոնապես չի հաղորդվել: Նշվում է, որ տուժածը «միջին ծանրության վնասվածքներ» է ստացել, իսկ նրա վիճակը «միջինի և ծանրի միջև» է:
Դերասանի որդին՝ Բեն Ֆորդը, Twitter-ում գրել է. «Հիվանդանոցում: Հայրս լավ է: Նա վնասվել է, բայց նա լավ է: Նա անհավանական ուժեղ մարդ է»:
Դատելով լուսանկարներից՝ Ֆորդի ինքնաթիռը երկտեղանոց Ryan PT-22-RY ուսումնամարզական ինքնաթիռ է:
Ներկայում հետաքննությունը փորձում է պարզել, թե որն է եղել ինքնաթիռի վթարային վայրէջքի պատճառը։