«Առաջին նախագահի նկատմամբ այնքան շատ հարձակումներ են լինում, և շատ դեպքերում մարդիկ, ովքեր նրա հետ երկար ճանապարհ են անցել, փորձում են առաջին հիմնադիր նախագահի կարևորությունը փոքրացնել, անտեսել և երբեմն փորձում են հավասարը հավասարի կարգավիճակում իրենց տեսնել»,- ասաց ԱԺ ՀԱԿ խմբակցության պատգամավոր Լյուդմիլա Սարգսյանը Լևոն Տեր-Պետրոսյանի վերաբերյալ հնչած կարծիքների վերաբերյալ: Նա նշեց, որ իր համար ոչինչ զարմանալի չէ, քանի որ պայքար է ընթանում ոչ միայն իշխանության, այլև ընդդիմության համար:
«Այստեղ ժողովրդին մխիթարելու ոչինչ չունեմ, որ նույնիսկ ընդդիմությունը, չունենալով ոչ մի լծակ, ընդդիմության դեմ պայքարում են ընդդիմադիր գործիչներ, որոնք այս կամ այն կերպ հայտնվել են ոչ հիմնական ընդդիմության հատվածում»,- հավելեց նա:
Նա նշեց, որ ինքը նորմալ է համարում, որ մարդիկ պետք է կարողանան իրենց դիրքը ամրապնդել ընդդիմության մեջ, բայց չպետք է մեկին ոչնչացնելով՝ սեփական տեղը ամրագրել:
«Մինչև հիմա արմատական ընդդիմությունը ամեն ինչ արել է, որպեսզի կարողանա բարեփոխել մեր երկրում տիրող իրավիճակը և կարողանա հեռացնել իշխանությանն ու արտահերթ ընտրությունների միջոցով ձևավորի օրինական իշխանություն: Բայց չեք կարող մեզ մեղադրել մի բանի մեջ. որ մենք ձեռքներս ծալած նստել-սպասում էինք, թե մյուս ընդդիմադիրները ինչ պետք է անեն»,- ընդգծեց պատգամավորը: