«Նոր ալիք» մրցույթի կազմակերպիչ Իգոր Կրուտոյը հաստատել է, որ Յուրմալայում տեղի ունեցող երիտասարդ կատարողների ամենամյա մրցույթն այս տարի տեղի կունենա Սոչիում: Այս մասին գրում է Ria Novosti-ն:
«Իմ կարծիքով` ամեն ինչ պարզ է, այլևս ի՞նչ ասել: Հաջորդ «Նոր ալիք»-ը տեղի կունենա Սոչիում: Մի՞թե դուք չգիտեք` ինչի հետ կապված: Երբ ձեր (Լատվիայի) նախարարն արգելում է ռուս կատարողների մուտքը …»,- ասել է Կրուտոյը:
«Ամենավերջին բանն է, երբ քաղաքական պահերն օգտագործվում են երաժշտության, թատրոնի հարթակներում: Իհարկե, այժմ քաղաքական դրությունը լարված է, և միայն ծույլն այն չի օգտագործում ինչ-որ հայտարարություններ անելու համար: Լատվիայի և Ռուսաստանի հարաբերությունների ամենաբարդ շրջանում էլ «Նոր ալիք»-ը Յուրմալայում է մնացել: Ժամանակներ են եղել, երբ դա եղել է մեր երկրների միջև միակ կամրջակը: Բայց այս տարի կամրջակը չդիմացավ»,- եզրափակել է Կրուտոյը:
