«Առաջին լրատվական»-ի զրուցակիցն է ԱԺ «Ժառանգություն» խմբակցության պատգամավոր Թևան Պողոսյանը:
-Պարոն Պողոսյան, ինչպե՞ս եք գնահատում ԵԽԽՎ-ում հայ պատվիրակության ձեռնպահ քվեարկությունը: Սա ի՞նչ ազդեցություն կարող է ունենալ Հայաստանի ճակատագրի վրա:
–Երևի ավելի իրական հաշվարկների մասին, կամ թե ինչ էր տեղի ունենում, և ինչու այդպիսի որոշում կայացվեց՝ ճիշտ կլինի, որ պատվիրակները խոսեն, բայց ես կգնահատեի, որ երևի այս պարագայում ընդհանրապես ճիշտ քայլ է արվել: Քիչ չեն եղել դեպքերը, երբ նույն Ռուսաստանի պատվիրակությունը հայկական պատվիրակներին որևէ օժանդակություն չի ցուցաբերել: Բացի այդ, մենք գիտենք, որ այնտեղ Ցեղասպանության մասին տեքստին ռուսական կողմը չէր միացել: Այնպես որ, երևի տեղին որոշում էր կայացվել, և ուրախ եմ: Մենք ինքներս պետք է գիտակցենք, որ աշխարհում բոլոր տիպի միջազգային կառույցներում պետք է առաջնորդվենք մեր սեփական շահերով, այլ ոչ թե այլ երկրների շահերով: Եվ եթե չկա նմանատիպ վերաբերմունք մեր հանդեպ, ապա մենք էլ պետք է նմանատիպ վերաբերմունք ցուցաբերենք:
-Դեռ նախորդ տարի վերլուծաբանները նշում էին, որ եթե Ռուսաստանը ԵԽԽՎ-ից դուրս գա, կարող է սպառնալ նաև Հայաստանին և մեր առջև էլ նման պահանջ կդնել: Որքանո՞վ եք սա իրատեսական համարում:
-Փորձել ամեն տեղ Հայաստանը և Ռուսաստանը կապել՝ երևի թե ամենամեծ սխալ քաղաքականությունն է: Սրանով ավելի շատ հետևում ենք այն մարդկանց, ովքեր փորձում են ընդհանրապես ասել, որ Հայաստանն ինքնիշխան պետություն չէ, չունի ո՛չ սեփական գաղափար, ո՛չ միտք: Ես կողմնակից չեմ այդ տեսակետներին: Շատ ժամանակ լինում է, որ Հայաստանը տարբեր ճնշումների չի դիմանում, բայց ինձ թվում է, որ բոլոր երևույթներից ելնելով՝ այնուամենայնիվ, Հայաստանը պետք է առաջնորդվի միայն ու միայն սեփական շահերով: ԵԽԽՎ Հայաստանը իր սեփական ցանկությամբ է գնացել՝ գիտակցելով, որ իր զարգացման ուղիների համար պետք է լինել այդ կառույցում, դրա հետ միասին՝ այդ կառույցի բոլոր արժեքները կիսելով՝ և́նպաստի ժողովրդավարությանը, և́փորձի ժողովրդավարական ինստիտուտները տեղափոխել նաև մեր մշակույթի մեջ:
Ավելին՝ տեսանյութում: