«Գյումրիում անմարդկային բան տեղի ունեցավ, ու կապ չունի, թե նա ինչ ազգից է: Քնած ժամանակ տուն մտնողի, երեխայի վրա, քնած մարդու վրա զենք բարձրացնողի մասին հնարավոր չի խոսել, ազգությունն էլ կապ չունի: Իսկ հենց ազգությունը շեշտում են, ուրեմն դա արդեն քաղաքականություն ա»,- ասաց ԵԿՄ նախագահ, գեներալ Մանվել Գրիգորյանը՝ անդրադառնալով Գյումրիում տեղի ունեցած սպանությանը: «Կապ չունի՝ հայ է, ռուս է, վրացի է, կապ չունի, պետք է ամենայն դաժանությամբ պատժվի: Տենց մարդկանց պետք է…»,- հավելեց գեներալը:
«Առաջին լրատվական»-ի հարցին, թե համաչա՞փ է համարում, որ ռուսները պետք է Պերմյակովին դատեն: «Ես չեմ էլ կասկածում, որ ռուսներն ավելի խիստ կվերաբերեն, քանի որ իրենք բարոյական իրավունք չունեն խիստ մոտեցում չցուցաբերեն: Մեկ ա, ինչ լուծում էլ տրվի, միլիոն ձևի կքննադատվի, բայց ես վստահ եմ, որ ռուսները խիստ կլինեն, կփորձեն ճշմարտությունը հանեն ջրի երես, քանի որ սա ավելի շատ իրանց հեղինակության խնդիրն ա, իրանց պատվի խնդիրն ա, իրանք են մեր երկրում»,- ասաց Մանվել Գրիգորյանը:
Մեր հաջորդ հարցին, թե ինչպե՞ս է վերաբերվում հարցին, որ ռուսական 102-րդ ռազմաբազան պետք է հեռացվի Գյումրիից, գեներալը նկատեց. «Ես կարծում եմ, որ ռազմաբազան հեռացնելը մի քիչ կոպիտ բան ա մեր համար, որովհետև մենք պայմանագիր ունենք, իրենք սահման են պահում: Դրա համար էլ ասում եմ, որ այս դեպքում ազգությունը պետք է թողնենք»: