Թուրքիայի խորհրդարանի նախագահ Ջեմիլ Չիչեքը Չեխիա կատարած պաշտոնական այցի ժամանակ խոսելով Հայոց ցեղասպանության մասին՝ կրկին ասել է կլիշե դարձած խոսքերը՝ Հայոց ցեղասպանության հարցը կապել «պատմաբանների հանձնաժողովի» հետ։ Այս մասին հաղորդում է թուրքական «Անադոլու» լրատվական գործակալությունը։
«Մենք պատրաստ ենք առերեսվել մեր սեփական պատմության հետ, սակայն անցյալում տեղի ունեցած իրադարձություններին պետք է գնահատական տան պատմաբանները, ոչ թե երկու կողմերի խորհրդարաններն ու միջազգային դատարանները։ Կրկնում եմ՝ թուրք ժողովուրդը պատրաստ է ընդունել իր երկրի պատմությունը»,- ասել է Չիչեքը։
Նշենք, որ Թուրքիան շարունակում է ժխտել Հայոց ցեղասպանության փաստը: Թուրքական կողմը Ցեղասպանության փաստը ճանաչելուց խուսափելու համար դիմում է ավելի ժամանակակից մեթոդների, ինչպիսին, օրինակ, «ընդհանուր ցավի» թեզն է: Վերջին շրջանում ակտիվորեն շրջանառվող այս թեզի դրույթներով՝ թեև թուրքական պաշտոնական շրջանակներն ընդունում են, որ 20-րդ դարասկզբին հայերը զրկանքներ են կրել, սակայն այն չեն կոչում ցեղասպանություն, հայերի կորուստները փորձում են հավասարեցնել թուրքական կորուստներին, իսկ արհավիրքը փորձում են տեղավորել Առաջին աշխարհամարտի շրջանակներում՝ այս ամենը կոչելով «ընդհանուր ցավ» և այդպիսով ժխտելով ցեղասպանության փաստը:
Այս ամենով հանդերձ՝ Թուրքիայի բարձրաստիճան պաշտոնյաները չեն վարանում ամեն հարմար առիթով հայտարարել, որ հայերը ցեղասպանության չեն ենթարկվել, ինչի ապացույցն էլ թուրքական պետության տարբեր քայլերն ու հայտարարություններն են: Թուրքիան գիտական, դիվանագիտական, քարոզչական ուղիներով շարունակում է Ցեղասպանության ժխտումը:
Հիշեցնենք, որ 2005 թվականի ապրիլի սկզբներին Թուրքիայի վարչապետ Ռեփեջ Թայիփ Էրդողանը նամակով դիմել էր ՀՀ նախագահ Ռոբերտ Քոչարյանին՝ առաջարկելով ստեղծել պատմաբանների հանձնաժողով` ուսումնասիրելու «1915 թվականի իրադարձությունները»: Ապրիլի 25-ին Քոչարյանը պատասխանել էր Էրդողանի նամակին, որում, մասնավորապես, ասվում էր. «Կառավարությունների պատասխանատվությունն է՝ զարգացնելու երկկողմ հարաբերությունները, և մենք իրավունք չունենք այդ պատասխանատվությունը լիազորելու պատմաբաններին։ Հայաստանը պատրաստ է քննարկել ցանկացած հարց միջկառավարական հանձնաժողովի մակարդակով»։
Հետագայում թուրքական իշխանությունները մշտապես հիշում են «պատմաբանների հանձնաժողովի» ստեղծման առաջարկը: Հետաքրքրական է, որ մինչ Էրդողանի՝ 2005-ի այդ նամակը հասներ Երևան, այն արդեն տարածվել էր ԱՄՆ օրենսդիր մարմիններում և տարբեր լրատվամիջոցներում:
