Թուրքիայի Չանաքքալե քաղաքի «Մարտի 18» անունը կրող համալսարանի ռեկտոր, հակահայ հայացքներով աչքի ընկնող թուրք փորձագետ Սեդաթ Լաչիները հայ-թուրքական հարաբերությունների վերաբերյալ հոդված է գրել։ Այս մասին տեղեկացնում է թուրքական «Ինտերնետ հաբեր» կայքը։
«Թուրքիայի արտաքին քաղաքականության ամենակարևոր խնդիրներից մեկը Հայկական հարցն է։ Հայերը պնդում են, որ 1915 թվականին Օսմանյան կայսրությունում տեղի ունեցածը ցեղասպանություն է, և ցանկանում, որ կատարվածի համար վճարի Թուրքիան։ Նախ, ուզում են, որ Թուրքիան ճանաչի Ցեղասպանությունը, այնուհետև մեծ գումարներ փոխհատուցի, դե, իսկ վերջում՝ հողերի վերադարձ։
Թուրքիան, իր հերթին, հրաժարվում է կատարել սույն պահանջները՝ հայտարարելով, որ կատարվածը ցեղասպանություն չէ, հայերը զոհվել են Առաջին համաշխարհային պատերազմի տարիներին, երբ երկրում չկար իշխանություն, բացի դրանից՝ մի շարք հիվանդություններ էին տարածված»,- ահա այս տողերով է սկսում իր հոդվածը թուրք պրոֆեսորը։
Լաչիները նշում է, որ հայերը լավ են նախապատրաստվում Ցեղասպանության 100-րդ տարելիցին։ Ըստ նրա՝ ապրիլի 24-ին, ամենայն հավանականությամբ, Ծիծեռնակաբերդ կայցելեն Հռոմի պապ Ֆրանցիսկոսն ու Ֆրանսիայի նախագահ Ֆրանսուա Օլանդը, ինչպես նաև չի բացառում, որ այդ օրը Երևանում կլինեն նաև ԱՄՆ նախագահ Բարաք Օբաման և Գերմանիայի կանցլեր Անգելա Մերկելը։
Փորձագետն անդրադարձել է նաև Թուրքիայի նախագահ Ռեջեփ Թայիփ Էրդողանի՝ ապրիլի 24-ի հրավերին. «ՀՀ նախագահին այդ օրը Թուրքիա հրավիրելու միտքն ամենևին էլ վատ չէր, բայց ուշացած էր»։
Հոդվածի վերջում Լաչիները շեշտում է, թե հայերը 2015 թվականը որպես վերջ չեն ընկալում։ Նա գտնում է, որ հայերը սա ընդունում են որպես ազգային զարթոնքի տարի, ճիշտ այնպես, ինչպես 1965 թվականին էր, երբ հայերը նշում էին Ցեղասպանության 50-րդ տարելիցը։
Նշենք, որ Սեդաթ Լաչիները հայ-թուրքական հարաբերություններով զբաղվող հայտնի թուրք փորձագետ է։ Այս թեմայի շուրջ մի քանի գրքեր է հեղինակել՝ «Հայկական հարցը, Սփյուռքը և Թուրքիայի արտաքին քաղաքականությունը», «Թուրքերն ու հայերը. միջազգային հարաբերությունների հետազոտություն», «Հայկական հարցի տեղեկատու» և այլն։