Բելառուսի մաքսային մարմինները արգելափակել են Կալինինգրադի մարզից էլեկտրոնիկայի փոխադրումը Ռուսաստան: Այս մասին TASS-ին հայտնել են GS Group ռուսական հոլդինգի մարքեթինգի հարցերով տնօրեն Անդրեյ Բեզռուկովը և «Տելեբալտ» էլեկտրոնիկայի գործարանի գլխավոր տնօրեն Վիկտոր Բորիսենկոն:
Երկու ընկերություններն էլ ապրանքն արտադրում են Կալինինգրադի մարզում և այն մեքենաներով Բելառուսի տարածքով փոխադրում Մոսկվա, Սանկտ-Պետերբուրգ և ռուսական այլ քաղաքներ:
«Բելառուսի մաքսային մարմինները փակել են GS Group ընկերության արտադրանքի փոխադրումն այդ երկրով: Ընդհանուր առմամբ, փակ է տրանզիտը Կալինինգրադի մարզում արտադրված ամբողջ էլեկտրոնիկայի համար, արգելանքի տակ է նաև մեր արտադրանքը: Ընկերության ղեկավարությունը ոչ մի ծանուցում չի ստացել Բելառուսի մաքսային ծառայության ներկայացուցիչներից, պարզապես դադարել են մեքենաներին թույլ տալ անցնել սահմանով, անցակետում ոչ մի պատճառ չի նշվել»,- TASS-ին ասել է Բեզռուկովը:
Նրա խոսքով՝ ներկայումս GS Group-ը պաշտոնական հարցում է պատրաստում բելառուսական անցակետին: «Պաշտոնապես մաքսային մարմինները կարող են բեռը կանգնեցնել ստուգելու համար, բայց անցակետով բեռների անցնելու ամբողջ ընթացքում այդպիսի ոչ մի դեպք չի եղել: Բելառուսի մաքսային մարմինների գործողությունները չպետք է կապված լինեն մաքսատուրքերի վճարման հետ. մենք տուրքերը վճարում ենք օրենքով սահմանված կարգով»,- ասել է Բեզռուկովը:
«Մեր մեքենաները դեկտեմբերի 3-ից կանգնեցվել են լիտվա-բելառուսական սահմանին… Դրանք արդեն տեղավորվել են ժամանակավոր պահպանության պահեստում, և մենք ստիպված ենք վճարել մեր ապրանքի պահպանման համար: Ներկայումս սահմանին 6 մեքենա է կանգնած՝ ընդհանուրը 45 մլն ռուբլու ապրանքով»,- TASS-ին ասել է Բորիսենկոն: Նրա խոսքով՝ ընկերությունը հարցումներ է ուղարկել Բելառուսի անցակետային մարմիններին և երկրի Գլխավոր դատախազություն, բայց դեռ պատասխան չի ստացել:
