Լեդի Գագան երկրպագուներին անընդհատ ապշեցնում է էպոտաժային կոստյումներով ու կերպարներով: Հարկ է նշել, որ դրանք փոխարինում են միմյանց մեծ արագությամբ: Մեկ օրվա ընթացքում երգչուհին կարող է փոխել մինչև չորս տարբեր ու յուրահատուկ ոճային կերպարներ:
Գագայի իսկական անունը Ստեֆանի Ջերմանոտտա է: Նա ծնվել է 1986թ. մարտի 28-ին Նյու Յորքում՝ իտալական ընտանիքում: Վաղ հասակից նա տարվել է երաժշտությամբ, իսկ չորս տարեկանում ինքնուրույն դաշնամուր նվագել է սովորել: Երաժշտության հանդեպ սերը նրան փոխանցվել է հորից:
14 տարեկանում Գագան արդեն երգել է նյույորքյան ակումբներում և դպրոցական թատրոնի բեմում: Ավելի ուշ նա սկսել է մշտապես ելույթ ունենալ Mackin Pulsifer և SGBand խմբի հետ:
2006-ին երիտասարդ տաղանդի վրա ուշադրություն է դարձրել պրոդյուսեր Ռոբ Ֆյուզարին, ում հետ նա ձայնագրել է մի քանի երգ և հայտնի է դարձել ակումբներում: Այդ ժամանակ էլ ընտրվել է նրա կեղծանունը, որը երգչուհին օգտագործում է մինչ օրս: Հետաքրքիր է, որ այն առաջացել է Queen-ի Radio Ga Ga երգից, քանի որ Ֆյուզարին նրան այդպես էր անվանում Ֆրեդի Մերկյուրիին նմանակելու համար:
