Ռուսաստանի նախագահ Վլադիմիր Պուտինը վստահ է, որ Ռուսաստանը և Մաքսային միության անդամ երկրները «պլյուս» նշանով դուրս կգան ներկա ճգնաժամից, այդ թվում՝ ինտեգրման հաշվին: TASS-ի հաղորդմամբ՝ այս մասին նա հայտարարել է ամենամյա մամլո ասուլիսի ժամանակ:
«Ղազախստանը, ինչպեսև Ռուսաստանը, նավթ և գազ արդյունահանող երկիր է: Առանց որևէ կապի ինտեգրման հետ՝ Եվրասիական տնտեսական միության շրջանակներում, այսպես թե այնպես, Ղազախստանը, ինչպեսև Ռուսաստանը, բախվում են անբարենպաստ արտաքին տնտեսական կոնյունկտուրայի: Մենք ունա՞կ ենք դուրս գալ այս իրավիճակից: Ես արդեն ասել եմ: Անխուսափելիորեն, այս իրավիճակից դուրս կգանք «պլյուս» նշանով, դրական արդյունքով: Եվ համաշխարհային տնտեսության ու էներգառեսուրսների պահանջմունքների ուժով, որոնք մենք ունենք»,- ասել է Պուտինը՝ նշելով, որ տնտեսությունները, այսպես թե այնպես, կհարմարվեն էներգակիրների ցածր գներին:
Պուտինը նշել է, որ Մաքսային միության գոյության ընթացքում Ռուսաստանի, Բելառուսի և Ղազախստանի միջև ապրանքաշրջանառությունն ավելացել է 50%-ով: «Դա, այնուամենայնիվ, լուրջ և օբյեկտիվ ցուցանիշ է, և մենք կհենվենք ամենից առաջ ինտեգրացման հետ կապված դրական կողմերի վրա»,- ասել է նա: