Բելառուսի նախագահ Ալեքսանդր Լուկաշենկոն դժգոհություն է հայտնել ռուսական իշխանությունների դիրքորոշումից, որոնք սահմանափակում են բելառուսական արտադրանքի փոխադրումները Ռուսաստան: Այս մասին հայտնում է BBC-ի ռուսական ծառայությունը:
«Ինձ այսօր ռուսական իշխանությունների վարքը ոչ թե պարզապես զարմացնում է, այլ ճնշում է: Եթե մոտ ժամանակներս հարաբերությունները 2 երկրների միջև չնորմալանա, մենք ստիպված կլինենք արձագանքել: Դա ի՞նչ վարք է»,- Մինսկում Սանկտ Պետերբուրգի ղեկավար Գեորգի Պոլտավչենկոյի հետ հանդիպման ժամանակ հայտարարել է Լուկաշենկոն:
Երկուշաբթի օրը Ռուսաստանը Բելառուսին խնդրել է նոյեմբերի 30-ից դադարեցնել մսամթերքի խմբաքանակների ձևակերպումը, որը Ռուսաստանով անցնում է այլ երկրներ: Ռուսասկան իշխանությունների հայտարարությամբ՝ դա կապված է նրա հետ, որ Բելառուսի հետ սահմանով Ռուսաստան են ներկրվում ապրանքներ, որոնց ներկրումը ներկայումս արգելված է:
Բացի դրանից՝ Ռուսաստանի անասնաբուժական և բուսասանիտարական հսկողության դաշնային ծառայությունն արգելել է 18 բելառուսական ձեռնարկությունների արտադրանքի ներկրումը Ռուսաստան: Արգելքի տակ է հայտնվել Ռուսաստան բելառուսական մսի ներկրման գրեթե ամբողջ ծավալը՝ մոտ 400 000 տոննա:
Ռուսական վերահսկողության գերատեսչությունը հայտարարում է բելառուսական սննդամթերքների անհամապատասխանությունը Ռուսաստանի և Մաքսային միության օրենսդրության նորմերին և պահանջներին՝ նշելով, որ դրանցում վնասակար միկրոօրգանիզմներ և հակաբիոտիկներ կան: