Իրանի նավթի նախարար Բիջան Նամդար Զանգանեհը նոյեմբերի 27-ին Վիեննայում կհանդիպի Սաուդյան Արաբիայից իր գործընկեր Ալի Ալ-Նաիմիի հետ, որպեսզի նավթային հսկային համոզի կրճատել նավթի արդյունահանման ծավալները: Այս մասին հայտնում է իրանական Mehr գործակալությունը:
Նախարարի խոսքով՝ Իրանը Նավթ արտահանող երկրների կազմակերպության (ՕՊԵԿ) բոլոր անդամներին կոչ է անում մոտեցնել իրենց դիրքորոշումներն ու նշում է, որ կազմակերպության անդամների միջև ցանկացած տարաձայնություն բացասական հետևանքներ կունենա «սև ոսկու» համաշխարհային գների վրա:
Բիջան Նամդար Զանգանեհը և Ալի Ալ-Նաիմին կհանդիպեն փակ դռների հետևում Վիեննայում՝ ՕՊԵԿ անդամ երկրների հերթական ամենամյա հանդիպման շրջանակներում: Գործակալությունը նշում է, որ 2 նախարարների հանդիպման ժամանակ կարող է առաջարկվել ՕՊԵԿ անդամ երկրների նավթի արդյունահանման ծավալը կրճատել օրական 1 մլն բարելով:
Նավթն արդեն մի քանի ամիս շարունակ էժանանում է. այս տարվա հունիսից նավթի գինը նվազել է մոտ 30%-ով: Նոյեմբերին ընթացիկ միջին գինը 76,53 դոլար է 1 բարելի դիմաց:
