Կոտայքի մարզի ընդհանուր իրավասության դատարանում Վաղինակ Մկրտչյանի նախագահությամբ ընթանում է Գարեգին Աբրահամյանի գործի դատական քննությունը:
Ըստ մեղադրանքի՝ 28-ամյա Գարեգին Աբրահամյանը 2014 թվականի մարտի 3-ին, ժամը 19-ն անց 30-ի սահմաններում Հրազդան քաղաքում, եղբայրներ Արմեն և Արայիկ Խ.-երին պատկանող առևտրի սրահին իր ունեցած պարտքը վերադարձնելու հարցի շուրջ վիճաբանել է Արմենի հետ:
Գործով չպարզված 3-4 հոգու հետ Աբրահամյանը ծեծի է ենթարկել Արմենին՝ պատճառելով առողջության թեթև վնասի հատկանիշներ չպարունակող վնասվածքներ:
Ըստ մեղադրանքի՝ Գարեգին Աբրահամյանն այսքանով չի բավարարվել:
Նույն օրը, ժամը 21-ի սահմաններում «Կրիստալ» հյուրանոցային համալիրին հարակից ճանապարհին Գարեգին Աբրահամյանը վիճաբանության մեջ է մտել խանութատեր եղբայրներից՝ Արայիկի հետ:
Գարեգինն իր մոտ եղած սուր կտրող-ծակող կամ սուր եզր ունեցող բութ առարկայով հարվածել է Արայիկի աջ աչքին, կրծքավանդակի առաջնային ձախ մակերեսին ու ձախ բազկին՝ պատճառելով աջ հոնքի վերք, աջ ակնագնդի սպիտակուցաթաղանթի պարունակության արտանկումով վնասվածք՝ տուժողի առողջությանը հասցնելով ծանր վնաս՝ զուգորդված ընդհանուր աշխատունակության 1/3-ի կայուն կորստով:
Գարեգին Աբրահամյանին մեղադրանք է առաջադրվել ՀՀ քրեական օրենսգրքի 112 հոդվածի 1-ին մասով և 118 հոդվածով:
Աբրահամյանի խափանման միջոցը կալանավորումն է:
