Թեև մի քանի ամիս առաջ կառավարության որոշմամբ նորաստեղծ Քննչական կոմիտեի համար որպես վարչական շենք հատկացվեց Երևանի Մամիկոնյանց փողոցի 46/5 հասցեում գտնվող վարչական շենքը, որտեղ նախկինում տեղակայված էր Երևանի քաղաքապետարանի «Շինվերանորոգում» ՊՓԲԸ-ն, սակայն այս օրերին անմիջապես վարչական շենքի բակում, վարչական շենքի վերանորոգմանը զուգահեռ, նոր շինարարություն է ընթանում: Անզեն աչքով էլ նկատելի է, որ նոր շինություն է կառուցվում:
Մեզ հասած տեղեկություններով՝ այս նոր շինությունը լինելու է Աղվան Հովսեփյանի նստավայրը: Նա չի համաձայնել, որպեսզի իր աշխատասենյակը տեղակայվի Քննչական կոմիտեի համար նախատեսված վարչական շենքում, և ձեռնամուխ է եղել իր նստավայրի կառուցմանը:
Քննչական կոմիտեի խոսնակ Սոնա Տռուզյանը «Առաջին լրատվական»-ի հետ զրույցում հաստատեց, որ նոր շինությունը պատկանելու է Քննչական կոմիտեին: «Հարակից կառուցվող շինությունը ևս պատկանելու է Քննչական կոմիտեին: Այնտեղ լինելու են կենտրոնական ապարատը և քննարկումների, նիստերի դահլիճը»,- ասաց Տռուզյանը:
Մեր դիտարկմանը, թե կառավարության որոշմամբ՝ միայն Մամիկոնյանց 46/5 հասցեում գտնվող վարչական շենքն է հատկացվել կոմիտեին, ինչպե՞ս է պատահել, որ հիմա նոր վարչական շենք է կառուցվում, Քննչական կոմիտեի խոսնակը նկատեց, որ կառավարության որոշմամբ՝ միայն շենքը չի հատկացվել, հողհատկացում է եղել, իսկ այդ հարակից տարածքը, որտեղ նոր շինություն է կառուցվում, ևս մտնում է այդ տարածքի մեջ:
«Երբ որ հատկացում է եղել, հողատարածքն է հատկացվել, կողքին այգի կա, որ վերակառուցվելու է, իսկ այդ հողատարածքի վրա նոր՝ ավելի ցածրահարկ շինություն է լինելու: Դա չի ունենալու ներկայումս նորոգվող շենքի բարձրությունը՝ լինելու է ցածրահարկ շինություն»,- հավելեց Տռուզյանը:
Նշենք, որ կառավարության նույն օրվա նիստում մեկ այլ որոշում կայացվեց առանց գնումների ընթացակարգի 27 միլիոն 500 հազար դրամ հատկացնել շենքի նորոգման համար: Տռուզյանից հետաքրքրվեցինք, թե այդ գումարով ինչպե՞ս են և շենքը վերանորոգելու, և նորը կառուցելու: Պարզվեց, սակայն, որ այդ 27 միլիոնը նախատեսված է միայն նախագծահաշվարկային փաստաթղթերի համար, իսկ շինարարության համար կառավարության որոշմամբ՝ առանձին գումար է հատկացվել: Խոսքը թերևս օգոստոսի 7-ին կայացած կառավարության նիստում կառավարության պահուստային ֆոնդից հատկացված 1 մլրդ դրամի մասին է, որից 880 միլիոն դրամը նախատեսված էր վարչական օբյեկտի հիմնանորոգման, իսկ 120 մլն դրամը՝ գրասենյակային գույքի ձեռք բերման համար:
