2015 թվականի պետական բյուջեն ունի հստակ սոցիալական ուղղվածութուն: Այս մասին այսօր ՀՀ Ազգային ժողովի մշտական հանձնաժողովներում 2015-ի բյուջեի նախագծի նախնական քննարկումների ժամանակ հայտարարել է ՀՀ վարչապետ Հովիկ Աբրահամյանը:
Նրա խոսքով՝ եկող տարվա բյուջեում պատշաճ մակարդակ է նախատեսված պաշտպանության, ազգային անվտանգության ոլորտներում: «Միաժամանակ ԼՂՀ ֆինանսավորումը շարունակելու ենք՝ 45.5 մլրդ դրամ: Նախագծում տնտեսական շեշտադրումներ կան՝ գործարար միջավայրի բարելավում, հենքային ոլորտների զարգացում, գործարարների վստահության ամրապնդում, հավասար պայմանների ապահովում ու երաշխավորում:
ԱԺ-ում է հիմա ԱԱՀ փոփոխությունների նախագիծ, որով կբացառվեն երկակի ստանդարտները: Հեղափոխություն չի լինի հաջորդ տարի, բայց տեղին ու արդյունավետ քայլ է: Իմ կարծիքով՝ որքան քիչ ստուգումներ լինեն, այնքան լավ»,- հայտարարեց Աբրահամյանը:
Նրա խոսքով՝ իրականացվող քայլերն ուղղված են տնտեսական միջավայրի բարելավմանը: «Մենք կախարդական փայտիկ չունենք, որ տարիներ շարունակ ձևավորված արատավոր պրակտիկան վերացնենք, սակայն ունենք կամք՝ քայլ առ քայլ դրանք վերացնելու համար: Մեր թիրախը խոշոր բիզնեսն է, որտեղ վերացնելու ենք ստվերը»,- ասաց վարչապետը՝ փոքր բիզնեսից խնդրելով համբերատար լինել:
Հովիկ Աբրահամյանը վստահեցրեց, որ գյուղը և նրա խնդիրները կմնան կառավարության ուշադրության կենտրոնում:
«Վարկային տոկոսադրույքի սուբսիդավորման, ագրարային ոլորտում տարբեր ուղղություններով զարգացման, ջրամբարների նախագծման և շինարարության աշխատանքներ են նախատեսված, որոնք պահանջում են մեծ ներդրումներ, և իրականացնում ենք դոնորների միջոցով: Կառավարությունը հետևողական է լինելու «Հյուսիս-հարավ» կենսական նշանակության ճանապարհների, սահմանային անցակետերի կառուցման ու արդիականացման, Սևանա լճի էկոլոգիական խնդիրների կարգավորման, անօրինական հորերի փակման հարցերում: Էներգետիկ ոլորտում մեր գործունեությունն ուղղված է լինելու էներգետիկ անվտանգության ապահովմանը»,- ընդգծել է վարչապետը:
Նրա ներկայացմամբ՝ կառավարության ծրագրերում նախատեսված են նաև կենսաթոշակների չափերի շարունակական աճի ապահովումն ու ինտեգրված սոցիալական ծառայությունների համակարգի բարելավումը:
«Առաջին անգամ եմ որպես կառավարության ղեկավար ներկայացնում բյուջետային նախագիծը: Կհամաձայնեք ինձ հետ, որ երկրի բյուջեն ամենապրագմատիկ փաստաթուղթն է, և մենք ծախսելու ենք այնքան, որքան ունենք՝ ողջամիտ: Հարկ է չկորցնել իրականության հետ կապը:
Մյուս կողմից՝ բյուջեի քննարկումները պետք է լինեն գաղափարական: Աշխարհի բոլոր երկրներում բյուջետային քննարկումները վեր են ածվում քաղաքական բանավեճերի: Այնուամենայնիվ, խնդրում եմ գիտակցել մի հանգամանք, որ սկզբունքային է կառավարության համար. երկրում տեղի են ունենում քաղաքական գործընթացներ, ունենք բազում կուսակցություններ, ամեն մեկն ունի իր քաղաքական շահը՝ սա նորմալ եմ համարում: Ես ունեմ այդ գործընթացների վերաբերյալ իմ կարծիքը, բայց այսօր ձեռնպահ կմնամ դա հնչեցնելուց: Խնդրում եմ հնարավորինս հեռու մնանք պոպուլիզմից»,- ամփոփեց Հովիկ Աբրահամյանը:
Լուսանկարը՝ Photolure-ի