Մադամ Տյուսոյի նյույորքյան թանգարանը նոր մոմե ֆիգուրներ է ներկայացրել իր հավաքածուի համար: Դրանք են բրիտանացի արքայազն Հարիի և թագուհի Եղիսաբեթ ІІ-ի արձանները: Այս մասին հայտնում է The Daily Mail-ը:
Ցուցասրահում արդեն կան Քեմբրիջի դուքս և դքսուհի Ուիլյամի և Քեյթի ֆիգուրները: Ողջ «թագավորական կազմը» Նյու Յորքում կարելի է տեսնել մինչև տարեվերջ, որից հետո նմուշները կուղարկվեն համաշխարհային շրջագայության:
Հարիի արձանի համար զինվորական համազգեստը տրամադրել է արքայազնի դերձակը, իսկ թագուհու արձանի զգեստի համար թանգարանի մասնագետներն այցելել են Բուքինգհեմյան պալատ, որտեղ կատարել են զգեստի չափումներն ու լուսանկարել այն: Զգեստը նույնպիսին է, ինչպիսին թագուին կրել էր իր թագադրման 60-ամյակի առիթով պաշտոնական դիմանկարի համար:
Թանգարանի մամլո քարտուղարը հույս է հայտնել, որ թագավորական ընտանիքի մոմե արձանները հիթ կդառնան ամերիկացի այցելուների համար, հատկապես դքսուհու՝ երկրորդ երեխային սպասելու վերաբերյալ նորությունների տաք հետքերով: