Սերժ Սարգսյանը երեկ այցելելով Հատուկ քննչական ծառայության նոր շենք` հայտարարել է, որ ծառայությունը լավ է աշխատում: Եթե հատուկ քննչական ծառայությունը լավ աշխատեր, Հայաստանում, ըստ էության, իշխանափոխություն պետք է լիներ:
Ինչո՞ւ: Որովհետև Հատուկ քննչական ծառայությունը զբաղվում է պաշտոնյաների հանցագործություններով կամ անօրինականության այլ դրսևորումներով: Իսկ եթե ՀՔԾ-ն զբաղվում է դրանով և լավ է զբաղվում կամ աշխատում, այնքան լավ, որ Սերժ Սարգսյանը գովում է, ապա դա նշանակում է, որ Հայաստանում պետք է պաշտոնյաների համատարած փոփոխություն լիներ: Այն պարզ պատճառով, որ ՀՔԾ-ն պետք է Հայաստանի պաշտոնյաների ճնշող մեծամասնության հանդեպ քրեական գործեր հարուցեր և հայց ներկայացներ դատարան կալանավորման որոշումների կապակցությամբ:
Այսինքն` Հայաստանում դրա հետևանքով պետք է փոխվեր ողջ իշխանական կազմը, կամ այլ կերպ ասած` պետք է տեղի ունենար իշխանափոխություն, քանի որ Հայաստանի գրեթե ցանկացած բարձրաստիճան պաշտոնյա տեղով հանդիսանում է անօրինականության կամ հակասահմանադրականության իրեղեն ապացույց` իր բազմաթիվ գործողություններով, որոնց բացահայտման համար ՀՔԾ-ին առանձնահատուկ որակների քննիչներ պետք չեն, բավարար են, այսպես ասած, «ուչաստկովիի մակարդակի» քննիչները:
Հայաստանում պաշտոնական կոռուպցիան հասել է այն աստիճանի և ստացել այնպիսի աղաղակող և բացահայտ դրսևորումներ, որ ուղղակի անզեն աչքով է նկատելի կոռուպցիայի չափերի անփոփոխությունը, փոխարենը ցինիզմի աճը կոռուպցիոն հարցերում ներգրավված պաշտոնյաների շրջանում: Եվ եթե այսօր իշխանության կազմի փոփոխություն տեղի չի ունեցել Հայաստանում, սա նշանակում է, որ Հայաստանում Հատուկ քննչական ծառայությունը լավ չի աշխատում, արդյունավետ չի աշխատում:
Հետևաբար` Սերժ Սարգսյանը կամ իրականությունից հեռու է, կամ էլ ՀՔԾ-ի աշխատանքը նա գնահատում է բոլորովին այլ չափանիշներով՝ ոչ այն, որոնք ընկած են այդ կառույցի բուն պաշտոնեական առաքելության հիմքում: Այսինքն` սա էլ, ըստ էության, նշանակում է, որ ՀՔԾ-ն Սերժ Սարգսյանի համար այլ աշխատանք է կատարում, և նա գոհ է դրանից: Սակայն այդ դեպքում Սերժ Սարգսյանը թող իր գրպանից վճարի ՀՔԾ-ի աշխատանքի համար, ոչ թե ՀՔԾ-ն վճարվի հարկատուների գրպանից, սակայն աշխատի Սերժ Սարգսյանի համար: