ԱՄՆ պաշտպանության նախարարությունը հայտարարել է, որ ուսումնասիրում է տեսագրությունը, որում ցուցադրվում են ԴԱԻՇ-ի («Իրաքի և Շամի իսլամական պետություն») գրոհայինները ամերիկյան զենքով՝ իբր թե նախատեսված սիրիացի քրդերի համար: Այս մասին գրում է BBC-ն:
Երկուշաբթի օրը ԱՄՆ ռազմաօդային ուժերը պարաշուտներով Քոբանի (Այն էլ-Արաբ) քաղաքը ԴԱԻՇ-ի գրոհայիններից պաշտպանող աշխարհազորայիններին նետել են զենք, զինամթերք և այլ ռազմական սարքավորումներ՝ ընդհանուր առմամբ 27 բեռնարկղ:
Պենտագոնի ներկայացուցիչ, կոնտրծովակալ Ջոն Կիրբիի խոսքերով՝ բեռնարկղերի մեծ մասը հասել են քուրդ աշխարհազորայիններին: Ավելի ուշ ԱՄՆ-ը հայտարարել է, որ մեկ բեռնարկղ հայտնվել է ԴԱԻՇ-ի կողմից վերահսկվող տարածքում, սակայն ոչնչացվել է, որպեսզի չհայտնվի ԴԱԻՇ-ի ձեռքում:
Սակայն համացանցում է հայտնվել ԴԱԻՇ-ի կողմից տեսագրություն, որում նրանք ենթադրաբար ցուցադրում են ամերիկյան զենքերը՝ նախատեսված քրդերի համար:
«Դա ակնհայտորեն նման է պարաշուտներից նետված բեռնարկղին: Այնպես որ՝ ես ամբողջությամբ չէի բացառի նման հնարավորությունը»,- ասել է Կիրբին՝ ո՛չ հաստատելով, ո՛չ հերքելով տեղեկատվության հավաստի լինելը:
