Եվրահանձնաժողովը դրական է գնահատել Թուրքիայի ջանքերը ԵՄ մուտքի անանցագիր ռեժիմի հասնելու առաջխաղացաման հարցում, սակայն դեռևս պատրաստ չէ խորհուրդ տալ չեղյալ հայտարարել անցագրերը` իշխանություններին կոչ անելով մի շարք օրենսդրական և վարչական բարեփոխումներ անցկացնել: Այս մասին գրում է RIA NOVOSTI-ն` վկայակոչելով Եվրահանձնաժողովի զեկույցը:
Եվրահանձնաժողովը երկուշաբթի Եվրախորհրդարանին և Եվրոպայի խորհրդին ներկայացրել է անանցագիր ռեժիմի անցնելու համար Թուրքիայի կիրառած չափանիշների առաջին գնահատականը:
«Ճանապարհային քարտեզի իմպլեմենտացիայի զեկույցը ցույց է տալիս, որ Թուրքիան բավական առաջ է շարժվել որոշ չափանիշների իրականացման հարցում և պատրաստ է հետագայում առաջընթաց կատարել բոլոր ձևաչափերի իրականացման հարցում` պայմանով, որ Թուրքիայի իշխանությունները կզարգացնեն համագործակցությունը ԵՄ-ի և բոլոր անդամ երկրների հետ համապատասխան ոլորտներում, ինչպես նաև կիրականացնեն մի շարք օրենսդրական և վարչական բարեփոխումներ»,- ասվում է զեկույցում:
Նշվում է, որ «օրենսդրական և վարչական ոլորտներում դրությունը, Թուրքիայի իրադարձությունները, ինչպես նաև ԵՄ-ի հետ ընդհանուր համագործակցությունը չեն հասել այն մակարդակին, որ Եվրահանձնաժողովը կարողանա ԵԽ-ին և Եվրոպայի Խորհրդին առաջարկել չեղյալ հայտարարելու Թուրքիայի քաղաքացիների նկատմամբ անցագրային պահանջները»:
Եվրահանձնաժողովը նշում է, որ Թուրքիայի փաստաթղթերի պաշտպանության ոլորտում անհրաժեշտ է սկսել նոր անձնագրերի թողարկումը` կենսաչափական տվյալներով, իրականացնել տեղեկատվության արդյունավետ փոխանակում և համագործակցել ԵՄ երկրների հետ կեղծ փաստաթղթերը հայտնաբերելու համար: Թուրքիայի իշխանություններին կոչ է արվում նաև սահմանների կառավարման առավել արդյունավետ և ժամանակակից համակարգ սահմանել, ինչպես նաև ավելի սերտ սահմանային համագործակցություն զարգացնել ԵՄ անդամ-երկրների հետ: