Ամերիկացի պետական գործիչ, քաղաքագետ և ԱՄՆ նախագահի ազգային անվտանգության հարցերով խորհրդական Զբիգնև Բժեզինսկին լավատեսորեն է տրամադրված Ուկրաինայի ապագայի և Ռուսաստանի հետ նրա հարաբերություների հանդեպ: Այս մասին նա ասել է «Ինտեր» հեռուստաալիքին ուղիղ միացման ժամանակ:
Նա միաժամանակ ընդգծել է, որ Ուկրաինայի անկախության տարիները իզուր վատնվել են:
«Ուկրաինայի անկախության առաջին 20 տարիները վատնվել են իզուր: Չեմ կարծում, թե պետք է ասեմ Ձեզ՝ ինչպես և ում շնորհիվ: Այժմ դա մարտահրավեր է Ձեզ բոլորիդ համար՝ անել այնպես, որ հաջորդ տասնամյակը հաջող լինի: Եթե հարցը դրան է վերաբերում, ապա ես բավականին լավատես եմ Ուկրաինայի և Ռուսաստանի ապագայի հանդեպ»,- ասել է Բժեզինսկին:
Նա նաև մեկնաբանել է Ուկրաինայի նախագահ Պյոտր Պորոշենկոյի և Ռուսաստանի նախագահ Վլադիմիր Պուտինի միլանյան հանդիպումը:
«Հավանաբար Պուտինն այդ բանակցությունների ժամանակ կհասկանա, որ Ուկրաինայում այժմ կա ղեկավարություն, որը հետաքրքրված է ոչ միայն սեփական հարստացման, այլև Ուկրաինան Եվրոպայի հաջող և ժողովրդավարական մաս դարձնելով, միևնույն ժամանակ դարձնելու այն Ռուսաստանի ոչ թշնամի երկիր: Կարծում եմ՝ կգտնվի դրական լուծում, որը կգոհացնի բոլորին»,-ասել է Բժեզինսկին:
«Երկիրը կարող է այնքան կախված կամ անկախ լինել, որքան թույլ կտան նրա բնակիչներն ու առաջնորդները»,-հավելել է նա:
Միևնույն ժամանակ, Բժեզինսկին նշել է, որ արևմտյան երկրները չեն մարտնչի Ուկրաինայի համար:
«Արևմուտքը բավականին հստակ հասկանալ է տալիս, որ իր համար ամեն ինչ միևնույն չէ: Սակայն մի՛ սպասեք, որ Արևմուտքը կպայքարի Ձեզ համար: Դա գլխավոր բանն է, որ պետք է հասկանաք»,- ասել է Բժեզինսկին:
Բժեզինսկին համոզված է, որ Ուկրաինան պետք է ապացուցի եվրոպական երկիր լինելու իրավունքը: