«Կայարան» բառը շատերի մոտ բացասական զգացողություններ է առաջացնում: Մինչդեռ աշխարհի շատ քաղաքներում կայարանները ոչ միայն լավ ռեստորաններ, այգիներ և գիշերային ակումբներ ունեն, այլև արվեստի իսկական գլուխգործոցներ են: Bigpicture.ru-ն ներկայացնում է դրանցից ամենահետաքրքիրները:
1.Ատոչան ոչ միայն Իսպանիայի ամենամեծ, այլև ամենահին կայարանն է: Կայարանի առաջին շենքը կառուցվել է 1851 թ.: 40 տարի անց կայարանում մեծ հրդեհ է եղել, և այն վերականգնվել է 1892 թ.: Ուղիղ 100 տարի անց՝ 1992 թ., աշխարհը տեսել է Ատոչայի ժամանակակից կայարանը: Հատուկ ուշադրության է արժանի կայարանի հին մասը, որտեղ 7000 բույսերով, 550 տեսակ կենդանիներով ու թռչուններով բուսաբանական այգի կա: Դրանից բացի, ուղևորների հարմարավետության համար այստեղ խանութներ, սրճարաններ և նույնիսկ գիշերային ակումբ կա:
2. Լյեժ-Գիյեմեն կայարանի պատմությունը սկսվում է 1842 թ., որից յոթ տարի անց Եվրոպայում հայտնվել են առաջին երկաթուղային կայարանները: 1958 թ. այն ամբողջությամբ վերակառուցվել է այդ ժամանակների ամենաժամանակակից ստանդարտներով: Կայարանը այս տեսքով ծառայել է մինչև 2009 թ., այդ ժամանակ էլ կառուցվել է նոր շինությունը, որն էլ այժմ է գործում: Կողքից նայողին թվում է, թե հսկայական շինությունը օդում է կախված: Սա եվրոպական այն սակավաթիվ կայարաններից է, որն ուղիղ կապված է ավտոմայրուղիների հետ: Բացի երկրի ներսում կապից, կայարանը միացնում է Լյեժը Փարիզի, Ախենի, Քյոլնի և Ֆրանկֆուրտի հետ: Կայարանի շինարարությունը 312 միլիոն դոլար է արժեցել:
3. Մումբայի Չխատրապատի Շիվաջի կայարանը ներառված է ՅՈՒՆԵՍԿՕ-ի Համաշխարհային ժառագության ցուցակում, իսկ կայարանի շինարարությունը 10 տարի է տևել: Այստեղից 18 ուղիներ են դուրս գալիս, որոնցից միայն յոթն են ազգային ուղղություններով շարժվում, մնացածները հեռավոր ճանապարհորդությունների համար են նախատեսված: Այստեղ նաև 78-տեղանոց փոքրիկ հյուրանոց կա:
4. Ստրասբուրգի Լյա Գար կայարանը արտաքինից ապակեպատ գմբեթ է, իսկ ներսում ավելի հետաքրքիր է: Բանն այն է, որ այսպես է պահպանվել 1883 թ. կառուցված շինությունը: Ստրասբուրգի առաջին կայարանը կառուցվել է 1854 թ., այնուհետև ամբողջովին քանդվել է և վերակառուցվել: Կայարանի ապակեպատ գմբեթի կառուցման վրա 150 միլիոն եվրո է ծախսվել: Կայարանը նաև հագեցած է Ֆրանսիայում ամենամեծ համակարգչային համակարգով, որի միացման պատճառով կայարանում 30 ժամով կանգեցվել է երթևեկությունը: Ներկա պահին կայարանը օրական 60 հազար ուղևորների է սպասարկում:
5. Կանաձավայի կայարանը երկրում կառուցված ամենահին կայարանն է, որը առաջին ուղևորներին ընդունել է 1851 թ.: Իր ներկայիս տեսքով կայարանը բացվել է 2005 թ.: Այս կայարանը ճարտարապետության ավանդական և ֆուտուրիստական ոճերի խառնուրդով շատ կարճ ժամանակում զբոսաշրջիկների շրջանում մեծ հետաքրքրություն է առաջացրել: Կայարանի գլխավոր փայտե դարպասները պատրաստված են ձեռքով, իսկ ապակե տանիքի տակ այս տեղանքին հատուկ բույսերով և բազմաթիվ շատրվաններով ոչ մեծ այգի կա:
6. Սամարայի ներկայիս կայարանը փոխարինելու է եկել Կույբիշևյան կայարանին, որը գործել է 120 տարի: Այն 12 ուղիներ է սպասարկում, ունի երկու սպասասրահ, ինչպես նաև ցայտաղբյուրներով ձմեռային այգի: Այս կայարանը Եվրոպայի ամենաբարձր կայարաններից մեկն է:
7. Լիսաբոնի Ռոսիու կայարանը հաճախ շփոթում են թանգարանի կամ թատրոնի շենքի հետ, ինչը պայմանավորված է նրա ճարտարապետական տեսքով, որն անփոփոխ պահպանվել է XIX դարի վերջերից սկսած: Այս կայարանը ոչ միայն արվեստի ստեղծագործություն է, այլև ինժեներական բարդ կառույց: Գնացքներն այստեղ քաղաքի երթևեկությանը չխանգարելու համար ստորգետնյա ճանապարհով են քաղաքից դուրս գալիս:
