Քիչ առաջ ավարտվեց խորհրդարանական խմբակցությունների ներկայացուցիչների և ԱԺ նախագահ Գալուստ Սահակյանի հանդիպումը։ Հանդիպումից հետո «Բարգավաճ Հայաստան» խմբակցության անդամ Միքայել Մելքումյանը լրագրողների հետ զրույցում ասաց, թե իրենք մի քանի սկզբունքային հարցեր են նշել, օրինակ՝ շահութահարկի դեմ պայքարող առևտրականների բարձրացրած հարցը չպետք է տարվի ավելացրած արժեքի հարկման դաշտ, և նրանց շրջանառության շեմը պետք է բարձրացվի։
Մ. Մելքումյանը նաև նշեց, որ իրենք պայմանավորվել են մինչև այսօր կառավարության հետ հարցուպատասխանի սկիզբը՝ հանդիպել գործադիրի համապատասխան ներկայացուցիչների հետ ու ներկայացնել իրենց առաջարկները։
ՀԱԿ խմբակցության քարտուղար Արամ Մանուկյանն էլ ասաց՝ իրենք ներկայացրել են, որ ստեղծված իրավիճակը կարող է քաղաքական լուրջ հետևանքներ ունենալ, քանի որ առևտրականների դժգոհության ալիքը Երևանից հասել է Գյումրի, և որ խորհրդարանական մեծամասնությունը դա պատկերացնում է։
Հարցին՝ հավատո՞ւմ եք, որ իշխանությունները կլուծեն հարցը, Մ. Մելքումյանն այսպես պատասխանեց. «Քաղաքականությունը հնարավորությունների արվեստ է, պետք է աշխատենք»: «Մենք մենակ չենք»,- իր հերթին ասաց Ա. Մանուկյանը։ «Հույսը վերջինն է մեռնում»,- ավելացրեց «Օրինաց երկիր» խմբակցության ղեկավար Հեղինե Բիշարյանը։