Արդարադատության նախարարի տեղակալ Արտյոմ Գեղամյանն աշխատանքից ազատվել է սեփական դիմումի համաձայն, այլ աշխատանքի անցնելու պատճառաբանությամբ: Նա «Առաջին լրատվական»-ի հետ զրույցում ասաց, որ ցանկություն ունի մասնավոր սեկտորում գործունեություն ծավալել, իսկ թե կոնկրետ ինչով է զբաղվելու՝ Գեղամյանը չհստակեցրեց, միայն նշեց, որ Հայաստանից չի հեռանալու:
«Շուտով կիմանաք՝ ինչով եմ զբաղվելու: Բայց ինչով էլ զվաղվեմ, ամենայն հավանականությամբ, Հայաստանում եմ մնալու»,- ասաց նա:
Նախկին փոխնախարարը, անդրադառնալով կարծիքներին, որ աշխատանքից ազատվել է արդարադատության նախարար Հովհաննես Մանուկյանի հետ լեզու չգտնելու պատճառով, արձագանքեց. «Ես նախարարի հետ շատ լավ հարաբերություններ ունեմ, ես նրա հետ համատեղ աշխատանքի երկար տարիների փորձ ունեմ: 5 տարի տնտեսական հարցերով դատարանում եղել եմ նրա օգնականը: Ըստ էության, ես վերադարձել էի իմ թիմ և աշխատում էի իմ թիմի հետ: Բայց հիմա այլ որոշում եմ կայացրել»,- ասաց Գեղամյանը՝ հավելելով, որ Հովհաննես Մանուկյանը ըմբռնումով է մոտեցել իր որոշմանը:
«Հաստատ էնտուզիազմով չարձագանքեց իմ որոշմանը, բայց ըմբռնումով մոտեցավ»,- ասաց արդեն նախկին փոխնախարարը՝ հավելելով. «Ամեն ինչ հրաշալի է, ամեն ինչի մեջ ինտրիգ մի փնտրեք»:
Հիշեցնենք, որ Արտյոմ Գեղամյանն աշխատանքից ազատվեց երեկ վարչապետ Հովիկ Աբրահամյանի հրամանով: Նա փոխնախարար էր նշանակվել Արդարադատության նախարարի փոփոխությունից հետո: