«Ամերիաբանկը» ընթացիկ տարում ընդլայնել է մանրածախ ծառայությունների տեսականին՝ այն համալրելով նոր ու հետաքրքիր առաջարկներով, միաժամանակ ապահովելով ծառայությունների մատուցման առավել պարզ ու ճկուն պայմաններ: Այս մասին այսօր լրագրողների հետ հանդիպման ժամանակ ասաց «Ամերիաբանկի» մանրածախ գործառնությունների գծով տնօրեն Արման Բարսեղյանը:
Նա ներկայացրեց այս տարվա ամռան ամիսներին բանկի նախաձեռնած երկու հիմնական՝ «Անկանխիկ ազատություն» և «Բումերանգ» քարտային արշավները:
Ըստ Բարսեղյանի՝ «Անկանխիկ ազատություն» քարտային արշավի հիմնական նպատակը քարտային բիզնեսի զարգացումն էր: «Անկանխիկ ազատություն» քարտային արշավի շրջանակներում մենք մեր հաճախորդներին առաջարկում ենք ոչ ստանդարտ մոտեցում: Մենք հաճախորդներին վարկային գիծ ենք տրամադրում՝ հասկանալով ամսվա ընթացքում նրա անկանխիկ վճարումների ծավալները: Այն հաճախորդները, որոնք ամսվա ընթացքում կներկայացնեն և կհիմնավորեն, որ այլ բանկերի կամ մեր բանկի քարտերով ունեցել են առնվազն 80 հազար դրամի ամսական շրջանառություն, ապա տվյալ շրջանառության մինչև տասնապատիկի չափով մենք վարկային գծեր ենք տրամադրում առանց լրացուցիչ փաստաթղթեր պահանջելու»,- նկատեց Բարսեղյանը:
Ինչ վերաբերում է «Բումերանգ» արշավին, ապա այն ուղղված է ՓՄՁ-ներին տրամադրվող վարկերի ծավալների աճին: Այս արշավի շրջանակներում «Ամերիաբանկը» բոլոր այն կազմակերպություններին, որոնք իրենց վարկերը կտեղափոխեն «Ամերիաբանկ», առաջարկում է ստանալ տեղափոխվող գումարի 1 տոկոսի չափով բոնուս, ինչպես նաև բանկը փոխհատուցում է տեղափոխման հարակից բոլոր ծախսերը: «Այսինքն՝ հաճախորդը հնարավորություն է ստանում միայն իր վարկը այլ բանկից մեր բանկ տեղափոխելով՝ ստանալ 1 տոկոս բոնուս, ինչպես նաև 1 տոկոսով զեղչված տոկոսադրույք»:
Ամփոփելով «Բումերանգ» արշավի ապահոված արդյունքները՝ բանկն այլևս նման ծառայություն է մատուցում ֆիզիկական անձանց համար, ովքեր այլ բանկերում ունեն վարկեր բնակելի և առևտրային նշանակության անշարժ գույքի ձեռքբերման, վերանորոգման և կառուցապատման նպատակով: Ֆիզիկական անձանց դեպքում կրկին նույն պայմաններն են գործում, պարզապես ֆիզիկական անձի դեպքում տեղափոխվող վարկի գումարը պետք է գերազանցի 10 միլիոն դրամը:
Նշենք, որ վերը ներկայացված երկու արշավներն էլ գործելու են մինչև տարեվերջ: