Ոչ իշխանական ուժերը ստորագրահավաք են նախաձեռնում, որպեսզի Ազգային ժողովի արտահերթ նիստ հրավիրեն ու «Շրջանառության հարկի մասին» օրենքում նոր փոփոխությունների նախագիծ առաջարկեն: Հիշեցնենք, որ այս օրենքում կատարված վերջին փոփոխությունների արդյունքում շրջանառության հարկը թեև 3,5 տոկոսից իջավ 1 տոկոսի, սակայն միաժամանակ տնտեսվարողներից պահանջում է փաստաթղթավորել ողջ շրջանառությունը: Իսկ այդ փաստաթղթավորման պահանջը դժգոհություն է առաջացրել փոքր ու միջին բիզնեսի մի շարք ներկայացուցիչների մոտ: Նրանք պատճառաբանում են, թե խոշոր բիզնեսն իրենց գնած ապրանքի դիմաց փաստաթուղթ չի տա, որ իրենք էլ այն ներկայացնեն հարկային մարմիններին:
«Բարգավաճ Հայաստան» կուսակցության պատգամավոր Միքայել Մելքումյանը «Առաջին լրատվական»-ի հետ զրույցում ասաց, թե իրենք ստեղծել են աշխատանքային խումբ և այսօր պետք է վերջնականապես որոշեն, թե ինչ նախագիծ են առաջարկում: Առայժմ ունեն երկու տարբերակ:
«Առաջինը կամավորության սկզբունքն է. ովքեր կցանկանան աշխատել 1 տոկոս շահութահարկով և փաստաթղթավորմամբ՝ թող աշխատեն, իսկ ովքեր չեն ցանկանում՝ թող մնա այսօրվա ռեժիմի շրջանակներում: Երկրորդը՝ եթե ամբողջ տեսականին փաստաթղթավորվում է, այդ դեպքում չի բացառվում, որ տնտեսվարող սուբյեկտի տարեկան շրջանառությունն անցնի 58,3 մլն դրամի շեմից, և նա գնա ավելացրած արժեքի հարկման դաշտ, որն արդեն կործանարար կլինի փոքրի համար: Դրա համար էլ մենք զուգահեռաբար առաջարկում ենք այդ 58,3 մլն դրամը բարձրացնել 120 մլն դրամ»,- ասաց Մ. Մելքումյանը:
Վերջինս համաձայն է այն տեսակետի հետ, թե Հայաստանի կառավարությունն օրենսդրական այս փոփոխությունն օգտագործում է փոքր ու միջին բիզնեսի միջոցով խոշոր բիզնեսին հարկային դաշտ բերելու համար: «Այո, սա լրացուցիչ գործիք է, որպեսզի խոշորի նկատմամբ էլ ուղղահայաց վարչարարություն չլինի»,- ասում է պատգամավորը:
Այդ դեպքում կառավարությունն ինչո՞ւ է վախենում խոշորին միանգամից բերել հարկային դաշտ, ինչո՞ւ է դա փորձում անել միջնորդավորված կերպով: «Դա պետք է կառավարությանը հարցնել: Դա մոտեցման խնդիր է: Մեկի մոտեցումը կարող է այնպես լինել, որ կտրուկ դնի՝ գործիքներ կիրառի, կա նաև փոքրից մեծին անցնելու տարբերակ: Այսինքն՝ փոքրը ստիպելու է մեծին գալ հարկային դաշտ, քանի որ փոքրը խոշորի շուկան է»,- եզրափակեց Մ. Մելքումյանը:
