Հայաստանում մեկնարկել է «Հայաստան-Սփյուռք» 5-րդ համաժողովը: Աշխարհի շուրջ 60 երկրների հայկական կազմակերպությունների ու կառույցների ղեկավարներ և ներկայացուցիչներ ժամանել են Հայաստան: Այսօր համաժողովում սփյուռքի ներկայացուցիչների կողմից հնչեցին կարծիքներ, որ նախորդ չորս համաժողովները մնացին թղթի վրա, արձանագրելուց բացի՝ որևէ նշանակություն չունեցան:
Սփյուռքի նախարար Հրանուշ Հակոբյանից հարցրինք՝ կիսո՞ւմ է արդյոք այս տեսակետը: Նախարարի խոսքով՝ ինքը պատասխանատու է չորրորդ համաժողովի համար, չորրորդի ամբողջ նյութերը բաժանված են բոլոր ներկաներին, որտեղ մեկ առ մեկ գրված է, թե ինչ հարց է բարձրացվել և յուրաքանչյուրին ինչ լուծում է տրվել: Նրա խոսքով՝ չկա որևէ հարց, որ օդում է մնացել, և չկա որևէ հարց, որ ծրագրերում տեղ չի գտել:
«Սփյուռքի նախարարությունը գիտե՞ք ինչու կայացավ… որովհետև մենք ականջալուր եղանք սփյուռքի ձայնին, մենք մեր ծրագրերը կառուցեցինք՝ հաշվի առնելով նրանց հարցադրումները, ոչ թե մեր գրասենյակներում նստած որոշում կայացրինք»,- ասաց նա:
Հայաստանում սփյուռքահայերը ներդրումների համար պարարտ հող չեն տեսնում՝ դիտարկմանը նախարարը պատասխանեց. «Այդպես ասողները բոլոր նրանք են, ովքեր քիչ են տեղեկացված, և ես կոչ եմ անում ցանկացած ներդրում անպայման Սփյուռքի նախարարության հետ քննարկեն, որպեսզի ճիշտ իրավաբանական օգնություն ցույց տրվի, որպեսզի Հայաստանում չգտնվի մեկը, որ խաբի: Շատ դեպքերում նրանք գործընկեր են գտնում, նրանց հետ աշխատում են, հետո հիասթափվում: Իսկ մեր օրենքները ճիշտ և լավ ներդրումներ կատարելու հնարավորություն տալիս են»,- ասաց նա:
Ավելին՝ տեսանյութում: