Գերմանիայի արտաքին գործերի նախարար Ֆրանկ Վալտեր Շտայնմայերն արտահայտվել է հօգուտ Թուրքիայի ԵՄ-ին միավորվելու հարցով բանակցային գործընթացի աշխուժացման։ Այդ մասին նա հայտարարել է Բեռլինում իր թուրք գործընկեր Մևլյութ Չավուշօղլուի հետ բանակցություններից հետո, հաղորդում է ITAR-TASS-ը։
Գերմանիան Բրյուսելում պնդում է Անկարայի հետ բանակցություններում նոր գլուխներ բացել ԵՄ մտնելու մասին, նշել է Շտայնմայերը։
«Հատկապես նրանք, ովքեր թերահավատորեն են տրամադրված, պետք է շահագրգիռ լինեն այն բաժինների բացմամբ, որոնք վերաբերում են իրավական համակարգի զարգացմանն ու այն հարցերին, որոնք կապված են մարդու իրավունքների պահպանման հետ»,- ընդգծել է նախարարը։ Դա, նրա խոսքով, թույլ կտա «Թուրքիայի հետ ուղղակիորեն խոսել այն մասին, թե էլի ինչ պետք է անել»։
ԵՄ-ին Թուրքիայի անդամակցության բանակցային գործընթացը շարունակվում է 2005 թվականից։ Այն բաժանված է 35 բաժինների կամ գլուխների, որոնք ընդգրկում են հանրապետության հասարակական, քաղաքական ու տնտեսական կյանքի բոլոր ոլորտները։ Այդ ամբողջ ժամանակաընթացքում բանակցություններ են բացվել 14 այդպիսի գլուխների շուրջ։
Բեռլինյան բանակցությունների ընթացքում երկու երկրների նախարարները քննարկել են նաև փոխգործակցությունը «Իսլամական պետություն» խմբավորման դեմ պայքարի պայմաններում։ Շտայնմայերն ու Չավուշօղլուն արտահայտվել են հօգուտ անվտանգության կառույցների ավելի սերտ համագործակցության՝ Սիրիա և Իրաք պոտենցիալ ջիհադականներին տարբեր պետություններից, այդ թվում՝ եվրոպական, մեկնել թույլ չտալու համար։
