«Էլլա» գիշերային ակումբի անվտանգության աշխատողներ՝ Գևորգ Սարգսյանի՝ Ջունգլի, վերջինիս հոր՝ Բաբկեն Սարգսյանի, Սարգիս Ղուկասյանի և Վիկտոր Սարգսյանի կողմից դաժան ծեծի հետևանքով մահացած ազատամարտիկ Վարդան Թումանյանի՝ «Ձի Վարդանի» դիակի դատաբժշկական փորձաքննության արդյունքները պատրաստ են և հաստատում են, որ Թումանյանի մահը վրա է հասել ծեծի արդյունքում: Փորձագիտական եզրակացության պատասխանը ավելի է բարդացնում գործով կալանավորվածների վիճակը:
Ազատամարտիկի քույրը՝ Մարիետա Թումանյանը, «Առաջին լրատվական»-ի հետ զրույցում ասաց, որ մյուս կողմը, մասնավորապես Ջունգլի հարազատները ընդդիմացել են հաստատված եզրակացության դեմ, փորձել են բողոքարկել եզրակացությունը՝ պնդելով, որ Թումանյանի մահը չէր կարող ծեծի հետևանքով լինել:
«Բայց դե, գոնե այս հարցում ոնց որ թե արդարություն կա: Դատաբժիշկները ճիշտ եզրակացություն են տվել և ուրիշ բան տալ էլ չէին կարող, քանի որ ամեն ինչ պարզից էլ պարզ էր: Ուզում են բողոքեն, ուզում են չէ` սա է իրականությունը: Դե թող հիմա գնան խմբակայինով դատվեն»,- ասաց տիկին Մարիետան՝ հավելելով, որ առ այսօր նախաքննական մարմնի կողմից չի գտնվել և չի կալանավորվել գործով մյուս մեղադրյալը՝ Վիկտոր Սարգսյանը:
Հիշեցնենք, որ դեպքը տեղի է ունեցել հուլիս ամսին: «Էլլա» գիշերային ակումբի անվտանգության վերը թվարկված աշխատողները Ջունգլի հոր՝ Բաբկեն Սարգսյանի և Վարդան Թումանյանի միջև լեզվակռվից ծագած վեճի արդյունքում դաժան ծեծի էին ենթարկել ազատամարտիկին, ով ծեծից հետո հիվանդանոցում մահացել էր: Ծեծի մասնակիցներից միայն Ջունգլն ու Սարգիսն են կալանավորված: Նրանցից երրորդը փախուստի մեջ է, իսկ Բաբկեն Սարգսյանն ազատ է արձակվել ստորագրությամբ չհեռանալու պայմանով:
