Հայաստանում ոչ իշխանական քառյակի շուրջ հետաքրքրական զարգացումները համընկան Ռուսաստանում «Սիստեմա» և «Ռոսնեֆտ» ընկերությունների միջև «Բաշնեֆտի» հայտնի գործում նոր զարգացումների հետ, որոնց շրջանակում տնային կալանքի ենթարկվեց «Սիստեմայի» տնօրենների խորհրդի նախագահ Եվգենի Եվտուշենկոն:
Թեև ռուսաստանցի մեկ այլ հայտնի գործարար` ՅՈՒԿՕՍ-ի գործով ձերբակալված և տարիներ շարունակ բանտում անցկացրած, ներկայումս ազատության մեջ գտնվող Միխայիլ Խոդորկովսկին հայտարարել է, որ ի տարբերություն իր գործի` այստեղ քաղաքական ենթատեքստ չկա, և ամեն ինչ զուտ տնտեսական շահերի մեջ է, այնուամենայնիվ տեղի ունեցող գործընթացները չեն կարող ապաքաղաքական լինել` հաշվի առնելով և՛ ժամանակակից աշխարհում քաղաքականության և տնտեսության սերտ կապվածությունը, և՛ այն, որ «Բաշնեֆտի» գործը բարեհաջող ավարտելու և այդ ընկերությունը «Սիստեմայից» վերցնելու դեպքում «Ռոսնեֆտի» նախագահ Սեչինը է՛լ ավելի մեծ ազդեցություն ձեռք կբերի Ռուսաստանում, հետևաբար նաև բոլոր այն քաղաքական տարածքներում, որոնք Ռուսաստանի ազդեցության տակ են:
Եվ այստեղ, ինչպես մենք արդեն հասցրել ենք նկատել, շատ հավանական է դառնում նաև այդ զարգացումների այս կամ այն արտացոլումը հայաստանյան քաղաքական դաշտում: Ահա այս տեսանկյունից է, որ հետաքրքրական են առաջին հայացքից իրար հետ որևէ կապ չունեցող իրադարձությունների զուգահեռ զարգացման հանգամանքները:
Ռուսաստանում տեղի է ունենում բավական կարևոր իրադարձություն «Բաշնեֆտի» գործում՝ քննությունը հասնում է «Սիստեմայի» անմիջական ղեկավարին, իսկ Հայաստանում էլ, սրան զուգահեռ, ըստ էության տրոհվում է ոչ իշխանական քառյակը: Ոչ ոք չի կարող պնդել, որ այս իրադարձությունները կապ ունեն, միմյանց տրամաբանական շարունակություն կամ հաջորդականություն են, առավել ևս, որ նման պնդումների հիպոթետիկ հիմքեր անգամ գրեթե չկան: Սակայն զուգահեռվելու փաստը ինքնին ուշագրավ է:
Թեև, ինչպես մեկ անգամ էլ առիթ ունեցել ենք գրելու, այնուամենայնիվ Հայաստանի ներքաղաքական կյանքի և մասնավորապես անուղղակիորեն նաև քառյակի հետ կապ կարող է լինել այն իրողությունը, որ «Սիստեմա» ընկերության տնօրեններից է նաև Հայաստանի նախկին նախագահ Ռոբերտ Քոչարյանը:
Եվ այս կոնտեքստում նաև հիշատակության արժանի է մեկ այլ հետաքրքրական փաստ: Հովիկ Աբրահամյանի ազդարարած ՌԴ վարչապետ Մեդվեդևի հայաստանյան այցի չկայանալը, որի ընթացքում ամենայն հավանականությամբ Մեդվեդևը կփորձեր նաև որոշ կուրացիաներ իրականացնել հայաստանյան ուժերի շրջանում, կամ Մեդվեդևի միջոցով կփորձեր Կրեմլը: