Հետաքննությունների դաշնային բյուրոն հայտարարել է ԱՄՆ-ում դեմքերի բիոմետրիկ ճանաչման համակարգի շուտափույթ ներդրման մասին: Համակարգը վեց տարի շարունակ մշակվել է, ծրագրի բյուջեն մեկ միլիարդ դոլար է կազմել: Որպեսզի հատուկ ծառայություններն ավելի հեշտ ճանաչեն մարդկանց, գործատուներին կստիպեն իշխանություններին ներկայացնել աշխատակիցների լուսանկարները, գրում է russian.rt.com-ը:
«Նոր սերնդի ճանաչման համակարգ» (NGI) անվանումը ստացած ծրագիրը մոտ ժամանակներս կիրականացվի ԱՄՆ-ում: Միլիարդավոր տեսախցիկներ ամեն օր կլուսանկարեն ԱՄՆ-ի բնակիչներին, որից հետո հավաքված տեղեկատվությունը կմշակվի բիոմետրիկ համակարգի միջոցով և կներմուծվի տվյալների միացյալ բազա:
Այսպիսով, ԱՄՆ-ի կառավարությունը մտադիր է հրաժարվել մատնահետքերով մարդկանց ճանաչելու համակարգից:
NGI-ն կարող է լուսանկարել ոչ միայն դեմքերը, այլև դաջվածքները, սպիները և մարդկանց առանձնացնող այլ հատկանիշներ:
ՀԴԲ-ի տվյալներով՝ արդեն հաջորդ տարի գերատեսչությանը կհաջողվի գրեթե 52 միլիոն ֆոտոդոսյե հավաքել:
Նոր տեխնոլոգիան ԱՄՆ-ում ակտիվ քննարկումների պատճառ է դարձել: Իրավապաշտպաններն անհանգստանում են նման տվյալների ապահով պահպանության համար, քանի որ դրանք, հայտնվելով հանցագործների ձեռքերում, կարող են լուրջ վտանգ ներկայացնել յուրաքանչյուր ամերիկացու համար:
