Վերաքննիչ քրեական դատարանի վարույթում է Սարգիս Խաչատրյանի գործով բերված վերաքննիչ բողոքի քննությունը:
Գործը քննվել է Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ:
19-ամյա Սարգիսը ուսումնական վաշտում ջոկի հրամանատար է, կոչումով՝ կրտսեր սերժանտ:
Ըստ մեղադրանքի՝ 2014 թվականի հունվարի 13-ին, ժամը 21-ի սահմաններում զորանոցի լսարանում զինվորական ծառայության պարտականությունների հետ չկապված՝ Խաչատրյանը կատակել է ընկերոջ՝շարքային Գագիկի հետ:
Խաչատրյանի ստորադրյալ, ժամկետային զինծառայող, շարքային Վարդանը միջամտել է կատակին, ինչը զայրացրել է ջոկի հրամանատարին:
Նա բռնություն է գործադրել, գրպանում եղած դանակը հանել ու հարվածել է շարքային Վարդանի որովայնի շրջանին՝ վերջինիս առողջությանը պատճառելով թեթև վնաս:
Դատարանում Սարգիս Խաչատրյանն իրեն մեղավոր է ճանաչել մասնակիորեն: Դեպքի օրը ընդգրկված է եղել որպես վաշտի հերթապահ: Զորանոցի պահեստանոցում դանակով միրգ է կտրատել: Մի զինծառայողի ձայն է լսել, դանակը դրել է գրպանը և դուրս եկել պահեստանոցից:
Ժամը 21-ին անձնակազմին ուղեկցել է առաջին հարկում գտնվող լսարան՝ «Հայլուր» ծրագիրը դիտելու:
Ծրագիրը դիտելու ընթացքում Գագիկը նստել է առաջին նստարանին, Վարդանը՝ երկրորդ, իսկ ինքը հենվել է հեռուստացույցի կողքի ջեռուցիչին ու զրուցել է Գագիկի հետ:
Սկսել են կատակել: Վարդանը միջամտել է իրենց կատակին, ինքը վազել է նրա ուղղությամբ, նա էլ վազել է լսարանի հետնամաս:
Ինքը հասել է Վարդանին, բռնել նրա հագուստից, քաշքշել է ու մոտը եղած դանակով անկանոն շարժումներ արել: Հանկարծ լսել է, որ Վարդանը «վախ» է ասել: Ինքը դադարեցրել է քաշքշոցը, արյուն է նկատել նրա որովայնի շրջանում, նախ ուշագնաց է եղել, ապա օգնել է վիրակապ դնելուն:
Նույն օրը տուժողին մի քանի անգամ հարցրել է, թե ինչպես է իրեն զգում, նա էլ պատասխանել է, թե հազալիս վնասված հատվածը մի քիչ ցավում է: Ինքը կատարվածի մասին հայտնել է հրամանատարությանը:
Խոհանոցային դանակն իր մոտ էր, երբ կատակում էր Գագիկի հետ. ինքը բռնել էր դանակի շեղբի ծայրից: Տուժողին դանակահարելու պատճառ ու նպատակ չի ունեցել:
Տուժողը դատարանում հայտնել է, որ չի հիշում, թե ինչպես է միջամտել Սարգիսի ու Գագիկի կատակին, հիշում է, որ Գագիկին ասել է. «Գագ ջան, դե բռնվի, ուժդ մենակ ինձ ա պատում»:
Սարգիսի ձեռքին դանակ չի տեսել կատակելու ընթացքում: Բայց երբ նրա հետ քաշքշել են իրար, ցավ է զգացել որովայնի հատվածում: Կոճակներն արձակել է, տեսել, որ արյուն է գալիս: Ինքն ու Գագիկը կտրեցրել են արյունը:
Սարգիսը դեպքի մասին հայտնել է մայորին, վերջինս զեկուցել է շտաբ, իրեն տարել են բուժկետ, հետո՝ հոսպիտալ:
Ինքը Սարգիսից բողոք կամ պահանջ չունի, դեպքը պատահական է եղել:
«Կատակի» երրորդ մասնակիցը՝ գործով վկա Գագիկը հայտնել է, թե Սարգիսի ու Վարդանի կատակին չի միջամտել, որովհետև լուրջ չի ընդունել, մտածել է՝ միջամտելու կարիք չկա: Շրջվել և ուրիշի հետ է խոսել: Հետո Վարդանն ասել է, թե դանակը միամիտ է կպել իրեն:
Ընդհանուր իրավասության դատարանը եզրակացրել է, որ ամբաստանյալն ու տւժողը իրոք կատակել են, միմյանց քաշքշել, ամբաստանյալը, թեկուզ կատակով, փորձել է ցավ պատճառել տուժողին: Բայց երբ վերջինս «վախ» է բացականչել, երբ նրա որովայնի շրջանում արյուն է երևացել, ամբաստանյալն անմիջապես դադարեցրել է «կատակը», նույնիսկ ուշագնաց է եղել:
Ամբաստանյալը հետո օգնել է տուժողին, ապա անընդհատ հետաքրքրվել է նրա վիճակով, կատարվածի մասին հայտնել է հրամանատարությանը:
Դատարանը հաշվի է առել, որ Խաչատրյանը միակողմանի ծնողազուրկ է, ծառայության ընթացքում բազմաթիվ խրախուսանքների է արժանացել, տուժողի հետ հաշտ է, վերջինս բողոք կամ պահանջ չունի:
Ընդհանուր իրավասության դատարանը Սարգիս Խաչատրյանին մեղավոր է ճանաչել ՀՀ քրեական օրենսգրքի 358.1 հոդվածի 3-րդ մասի 3-րդ, 4-րդ կետերով և դատապարտել է 4 տարի ազատազրկման: Ապա պայմանական դատապարտություն է կիրառել ու սահմանել 4 տարի փորձաշրջան:
Դատավճռի դեմ վերաքննիչ բողոք է ներկայացրել մեղադրող դատախազը: Ըստ բողոքաբերի՝ դատարանն անհիմն կերպով է պայմանական դատապարտություն կիրառել, կատարած արարքի համար ամբաստանյալ Խաչատրյանը պետք է դատապարտվեր 4 տարի իրական ազատազրկման: