Այսօր՝ օգոստոսի 29-ին, լեգենդար փոփ երգիչ Մայքլ Ջեքսոնի երկրպագուները տոնում են իրենց կուռքի ծննդյան օրը:
Երգիչը ծնվել է 56 տարի առաջ՝ 1958թ., արժանացել է 15 «Գրեմմի» մրցանակի: Դեռ կենդանության օրոք նա արժանացավ «երաժշտության փոփ արքա» կոչմանը և այդ տիտղոսը պահպանել է մինչ օրս, գրում է august.ru-ն:
Ջեքսոնը բոլոր ժամանակների ամենաշատ սկավառակ վաճառած արտիստն է (780 միլիոն սկավառակ): Նրան են պատկանում աշխարհի ամենավաճառվող ստուդիական ալբոմը (վերջին տեղեկություններով՝ Thriller-ի 175 միլիոն օրինակ), ամենավաճառվող ռեմիքս ալբոմը (Blood on the Dance Floor: HIStory in the Mix, 11 միլիոն օրինակ), ամենաշատ վաճառված երկսկավառականի ալբոմը (HIStory 20 միլիոն ալբոմ, 40 միլիոն սկավառակ) և ամենաթանկարժեք տեսահոլովակը (Scream):
Ջեքսոնը 13 անգամ գրանցվել է «Գինեսի ռեկորդների գրքում» և համարվում է բոլոր ժամանակների ամենանշանավոր ու ազդեցիկ արտիստներից մեկը։
Ջեքսոնն այն եզակի երգիչներից է, ում անունը 2 անգամ գրանցվել է ռոք-ն-ռոլլի փառքի սրահում։
Երգիչը մահացել է 2009թ. հունիսի 25-ին Լոս Անջելեսում: Նա 50 տարեկան էր: Համաձայն մահվան պաշտոնական վարկածի՝ մահվան պատճառ է դարձել սրտի կանգը դեղամիջոցների չարաշահման հետևանքով: