ՀՀ բնապահպանության նախարար Արամայիս Գրիգորյանն այսօր կառավարության նիստից հետո պատասխանեց լրագրողների հարցերին: Նա անդրադարձավ լրագրողների բարձրացրած՝ Հովիկ Աբրահամյանի մերձավորներին պատկանող արտեզյան հորերն անխնա օգտագործելու խնդրին՝ նշելով, որ բացարձակապես նման բան չկա, դրանք հերյուրանքներ են:
«Եթե դուք արձակուրդների մեջ չլինեիք, կմասնակցեիք մեզ հետ տեղերում, որտեղ ինքնաշատրվանող հորեր էինք փակում, որովհետև տեղում ուսումնասիրելուց, տեսնելուց հետո ձեզ մոտ նման հարց չէր առաջանալու»,- ասաց նախարարը:
Իսկ արդյոք փակո՞ւմ են հորեր, որոնք Հովիկ Աբրահամյանի մերձավորներին են պատկանում: Նախարարը պատասխանեց. «Մենք բոլոր ինքնաշատրվանող ապօրինի հորերը փակում ենք: Դուք կարող եք մեզ հետ գալ, ուսումնասիրություններ անել, մասնակից լինել և ձեր բոլոր հարցերի պատասխանները կստանաք»:
Անդրադառնալով Ամուլսարի շահագործման խնդրին՝ նախարարը նշեց, որ առաջիկայում լսումներ կլինեն, բաց լսումներ կիրականացնեն, տեղեկացված կլինեն բոլոր հարցերի հետ կապված:
Հարցին՝ բնապահպանության նախկին նախարարի կադրերից նոր նախարարն ազատվո՞ւմ է, նախարարը պատասխանեց. «Ոչինչ չունեմ ասելու: Բացարձակապես որևէ մեկին չեմ փոխել, մարդիկ, ովքեր չեն կարողանում աշխատել, բնականաբար ներկայացնում են, որ ի վիճակի չեն աշխատել, ազատման դիմումներ են գրում, ազատվում»:
Նախարարը նաև հավելեց, որ այս պահին չի կարող ասել, թե քանի հոգի են դիմում գրել, երևի թե երկու-երեքը:
Ասում են՝ կոպիտ եք խոսում աշխատակիցների հետ: Ի պատասխան այ դիտարկման՝ նախարարը նշեց. «Ես կուլտուրապես բարձր մարդ եմ, իսկ նման տգետները, որ նման բան են ներկայացնում, մի՛ հավատացեք, դրանք հերյուրանքներ են»:
Ավելին՝ տեսանյութում:
