ՀՀ արտգործնախարարի տեղակալ Շավարշ Քոչարյանը այսօր կառավարության նիստից հետո լրագրողների հետ զրույցում անդրադարձավ ՀՀ արտգործնախարար Էդվարդ Նալբանդյանի՝ Թուրքիայի նորընտիր նախագահ Էրդողանի երդմնակալության արարողությանը մասնակցելուն: Նա նշեց, որ Էդվարդ Նալբանդյանի մասնակցությունը պայմանավորած էր նախագահի ընտրությամբ:
«Դրանից օրեր առաջ նախագահ Սերժ Սարգսյանը հայտարարել էր, որ, ամենայն հավանականությամբ, մենք կմասնակցենք այդ արարողությանը արտգործնախարարի մակարդակով, ինչը տեղի ունեցավ»,- ասաց նա՝ հավելելով, որ նման արարողակարգերի մասնակցությունը ավանդական է, և միշտ տեղի է ունենում փոխանակում:
Ինչ վերաբերում է Թուրքիային, ապա այնտեղ, Շավարշ Քոչարյանի խոսքով, նախկինում երդմնակալություն երբևէ չի եղել, քանի որ մինչ այդ Թուրքիայի նախագահ ընտրվում էր պառլամենտի կողմից, և սա առաջին դեպքն է, երբ հարևան երկրում երդմնակալություն է լինում:
Իսկ ո՞վ է մասնակցել Թուրքիայից Սերժ Սարգսյանի երդմնակալությանը: Շավարշ Քոչարյանը նշեց, որ մասնակցել են դեսպանի մակարդակով, որը նստած է Թբիլիսիում:
Հայ-թուրքական սահմանի բացումից էլ, արտգործնախարարի տեղակալի խոսքով, ոչ մի լուր չկա: