Հենց նոր ավարտվեց ԲՀԿ-ՀՅԴ խմբակցությունների անդամների հանդիպումը: Հանդիպմանը մասնակից ԲՀԿ անդամներ Վարդան Օսկանյանը, Ստեփան Մարգարյանը և խմբակցության քարտուղար Նաիրա Զոհրաբյանը հրաժարվեցին մեկնաբանություններ տալ, թե ինչի մասին են խոսել՝ այդ պարտականությունները թողնելով ՀՅԴ խմբակցության ղեկավար Արմեն Ռուստամյանի վրա:
Վերջինս լրագրողների հետ զրույցում ասաց, որ քննարկել են կուտակային կենսաթոշակային համակարգի մասին նոր օրենքը Սահմանադրական դատարանում վիճարկելու մասին հարցը: Նա ավելացրեց որ ՀՅԴ-ն ԲՀԿ-ի հետ միասին հակված է դիմել ՍԴ, մինչդեռ ՀԱԿ-ն ու «Ժառանգությունը» համաձայն չեն դրան:
Քննարկվել են նաև օգոստոսի սկզբին Ադրբեջանի կողմից հայկական սահմանների նկատմամբ դիվերսիոն գործողություններ կատարելուց հետո խորհրդարանականների՝ սահմանամերձ մարզեր կատարած այցելությունների արդյունքները, մասնավորապես, սահմանամերձ համայնքներին սահմանապահ համայնքների կարգավիճակ տալու հարցը:
«Առաջին լրատվական»-ը հետաքրքրվեց՝ չե՞ն քննարկել արդյոք սահմանադրական փոփոխությունների մասին հարցը, չէ՞ որ, մամուլի հրապարակումների համաձայն, իրենք հենց այդ նպատակով էին հանդիպում: Արմեն Ռուստամյանը հաստատեց, որ քննարկել են նաև այդ հարցը: Նա ավելացրեց, որ կողմ են սահմանադրական այնպիսի փոփոխությունների, որոնք համապատասխան կլինեն իրենց հայեցեկարգին: Ապա ՀՅԴ պատգամավորը համաձայնեց, որ իսկապես, այդ հարցում ՀՅԴ-ն քառյակի մյուս ուժերի հետ տարաձայնություններ ունի:
Ա. Ռուստամյանն ասաց, թե չեն անդրադարձել իշխանություններին ուղղված քառյակի 12 պահանջների կատարման ընթացքին և սեպտեմբերի 30-ին իրենց խոստացած հանրահավաքին վերաբերող հարցերին: Նա չցանկացավ պատասխանել «Առաջին լրատվական»-ի այն հարցին, թե ՀՅԴ-ն ինչպե՞ս է գնահատում վարչապետ Հովիկ Աբրահամյանի գործունեությունը, չէ՞ որ նա պաշտոնավարում է արդեն չորս ամիս: