Մեծ Բրիտանիայի իշխանությունները երկրի քաղաքացիներին կոչ են արել ոստիկանությանը հայտնել այն մարդկանց մասին, որոնք ենթադրաբար «ձգտում են ահաբեկիչ դառնալ» կամ իսլամական արմատականության նշաններ են ցուցաբերում: Համապատասխան ուղերձով հանդես է եկել Լոնդոնի ոստիկանության կոմիսարի օգնական և հակաահաբեկչական կոմիտեի ղեկավար Մարկ Ռոուլին, հայտնում է BBC News-ը:
«Մենք դիմում ենք երկրի բնակիչներին, ընտանիքների անդամներին և ընկերներին՝ օգնելու մեզ բացահայտել պոտենցիալ ահաբեկիչներին: Հնարավոր է՝ նրանք պատրաստվում են արտասահման մեկնել կամ նոր են վերադարձել ուղևորությունից, կամ արմատականության նշաններ են ցուցաբերում»,- հայտարարել է Ռոուլին: Նա խորհուրդ է տվել առանձնակի ուշադրություն դարձնել կասկածելի վարքի ցանկացած դրսևորմանը, մասնավորապես եթե մարդը վաճառոմ է իր ողջ ունեցվածքը կամ փող է հավաքում արտասահման մեկնելու համար:
Ռոուլին հայտնել է, որ հակաահաբեկչական գործերով ձերբակալությունները 5 անգամ գերազանցել են նախորդ տարվա ցուցանիշը: Նա նշել է, որ 2014 թ. առաջին 3 ամիսների ընթացքում ձերբակալվել է 69 մարդ, որոնք ծրագրել են մեկնել Սիրիա կռվելու կամ ահաբեկչություն են հովանավորել: