«Ես շնորհակալ եմ իրավապահ մարմիններին, որ արձանագրեցին այդ դեպքերը, ինձ համար ընդունելի չէ, երբ համայնքային կամ պետական բյուջեից են օգտվում, նման քայլերի են դիմում, դրա համար արդեն որոշ անձինք կալանավորված են, քննություն է տեղի ունենում, քննությունից հետո ամեն ինչ պարզ կլինի»,- անդրադառնալով «Կենտրոն մաքրություն» ՓԲԸ կեղծ հավաքարարների և չարաշահումների վերաբերյալ «Առաջին լրատվական»-ի հարցին՝ ասաց Երևանի քաղաքապետ Տարոն Մարգարյանը՝ հավելելով, որ հիմա սպասում են իրավական գործընթացի վերջնական արդյունքներին:
Հիշեցնենք, որ, մամուլի հրապարակումների համաձայն, «Կենտրոն մաքրություն» ՓԸԲ-ում կեղծ հավաքարարների անվան տակ հափշտակված գումարը կազմում է շուրջ 300 մլն դրամ։
«Առաջին լրատվական»-ը Տարոն Մարգարյանից նաև հետաքրքրվեց՝ քաղաքապետը ինչպե՞ս է գնահատում Կենտրոն համայնքի ղեկավարի աշխատանքը՝ հաշվի առնելով այն, որ գործակարգավարականներից մեկի ժամանակ անբավարար էր գնահատել Կենտրոն համայնքի ղեկավարի աշխատանքը: Նա պատասխանեց, որ վերջին 4 տարիների ընթացքում ձևավորված է աշխատանքային մոտեցում. ամեն ամիս գնահատման աշխատանք է իրականացվում վարչական շրջանի աշխատակազմերի գործունեության մասով ՝ ըստ ոլորտների համապատասխան վարժություններով. «Երբ որ անբավարար եմ գնահատել, դա ընդամենը վերաբերում է մեկ ամսվան, բալային առումներով ինձ համար անընդունելի է, երբ որ Կենտրոն վարչական շրջանը այդքան հարուստ, այդքան մեծ աշխատակազմով կարող է լինել վերջին տեղում, բայց իմ ցանկությունն է, որպեսզի 12 վարչական շրջաններն էլ լինեն առաջին տեղում»,- եզրափակեց քաղաքապետը:
Առավել մանրամասն՝ տեսանյութում: