Իրավաբան Նարեկ Ալոյանը դեռևս 2012 թվականից տեղեկատվություն ստանալու պահանջով թվով 5 հարցում է ուղարկել «Բարգավաճ Հայաստան» կուսակցությանը և այդպես էլ պատասխան չի ստացել ո՛չ օրենքով սահմանված հնգօրյա ժամկետում, ո՛չ էլ առհասարակ: Դրանից հետո իրավաբանը դիմել է դատարան՝ պահանջելով ճանաչել տեղեկատվության տրամադրման իրավունքի խախտման փաստը և ԲՀԿ-ին պարտավորեցնել, որպեսզի տրամադրի հարցվող տեղեկությունները:
Երեկ տեղի է ունեցել նախնական դատական նիստը, որի ընթացքում որոշվել է, որ դատաքննությունը կսկսվի հոկտեմբերի մեկին:
«Առաջին լրատվական»-ի հետ զրույցում Նարեկ Ալոյանն ասաց, որ ինքը երեկ միջնորդություն է ներկայացրել ԲՀԿ առաջնորդ Գագիկ Ծառուկյանին դատարանում որպես վկա հարցաքննելու համար, իսկ պատասխանող կողմը՝ ԲՀԿ ներկայացուցիչ Դավիթ Մանթաշյանը, առարկել է միջնորդությանը․ «Դատարանը բավարարեց իր առարկությունը: Այնուհետև փաստաբան Դավիթ Մանթաշյանը միջնորդություն ներկայացրեց, որ գործը կարճվի, որ իմ կողմից ներկայացված հայցն անհիմն է, և ընդգծեց, որ դատական գործի ձգձգումը վնասում է ԲՀԿ-ի աշխատանքին, դատարանն այդ միջնորդությունն էլ մերժեց»:
Այնուհետև Ալոյանը նշեց, որ ինչպես բոլոր դեպքերում, այնպես էլ այս դեպքում դատարանն առաջարկել է հաշտություն տարբերակը մինչև հոկտեմբերի մեկը․ «Ես ներկայացրեցի միջնորդություն արագացվող դատաքնությունն կիրառելու համար, քանի որ գտնում եմ, որ իմ հայցը ակնհայտ հիմնավոր է, բացի այդ՝ գործի արագ քննությունը բխում է հասարակության շահերից»:
Մեր զրուցակիցն ընդգծեց նաև, որ իր տպավորմամբ՝ ԲՀԿ ներկայացուցիչը բավականին ագրեսիվ էր տրամադրված․ «Նա ասաց, որ հաշտության տարբերակի հետ կապված՝ կարծիք ունի, բայց դատարանը չթողեց այդ կարծիքը հայտնի, որովհետև դատավարական հատուկ ժամանակ կա այդ կարծիքը հայտնելու: Բացի այդ՝ հրաժարվեց պատասխանել ներկա լրագրողի հարցերին ու հեռացավ»: