«Առաջին լրատվական»-ի զրուցակիցն է «Ազգային անվտանգություն» կուսակցության նախագահ Գառնիկ Իսագուլյանը:
-Պարոն Իսագուլյան, սկսած հուլիսի 25-ից՝ հայ- ադրբեջանական սահմանին աննախադեպ լարված իրավիճակ էր: Որոշակիորեն խաղաղվել է Սոչիում տեղի ունեցած Սարգսյան-Ալիև-Պուտին եռակողմ հանդիպումից հետո, ի՞նչ եք կարծում արդյոք երկարատև կլինի՞:
-Նախ շատ կարևոր էր, որ այդ հանդիպումը տեղի ունեցավ: Հատկանշական է, որ այս անգամ Ադրբեջանը փորձում էր հայ-ադրբեջանական սահմանին պրովոկացիաներ ստեղծել՝ ցույց տալու աշխարհին, որ կոնֆլիկտը ոչ թե Ադրբեջանի և Լեռնային Ղարաբաղի միջև է, այլ Ադրբեջանի և Հայաստանի: Դրան հաջորդեցին Հայաստանում բավականին լուրջ միջոցառումներ, որը ցույց տվեց, որ մեր հասարակությունը բավականին մոբիլ է և ցանկացած նման վտանգի դեպքում կարողանւմ է կենտրոնացնել իր ուժերը: Դա արտահայտվեց և՛ քաղաքական ուժերի գործողությունների մեջ՝ այդ թվում խիստ ընդդիմադիր, ինչպես նաև մեր ազատամարտիկները, որոնք շատ կարճ ժամանակահատվածում կարողացան, միմյանց հետ խորհրդակցելով, ստեղծել բավականին լավ ռեզերվ:Այդ ամեն ինչը երևում էր ոչ միայն Հայաստանի ներսում, այլևդա տեսնում էին նաև Ադրբեջանը և մեր տարածաշրջանով հետաքրքրվող գերտերությունները:
Այն, ինչ տեղի ունեցավ Սոչիում, ցույց տվեց, որ մենք՝ որպես հաղթող կողմ, բավականին լուրջ պոտենցիալ ունենք: Ես վստահ եմ, որ բանավոր պայմանավորվածությունները մի պետության հետ, որն այսօր աշխարհաքաղաքական գործընթացներում լուրջ դերակատարություն ունի, բավական է, որպեսզի կողմերը՝հատկապես Ադրբեջանը, խաղաղություն պահպանեն: Ես ընդհանրապես համարում եմ, որ պատերազմի վերսկսման վտանգ մոտակա 10 տարիների ընթացքում անհնար է, դրան նպաստում է նաև մեր բանակի այսօրվա վիճակը: Չասենք իդեալական է, բայց չի կարելի համեմատել Ադրբեջանի բանակի հետ:
–Արդյոք ստեղծված իրավիճակում չե՞ն փոխվում նաև ներքաղաքական առաջնահերթությունները: Քառյակը 12 պահանջ է ներկայացրել իշխանություններին,որոնք չկատարելու դեպքում հանրահավաքներ կլինեն: Այդ ամենը չի՞ մղվում երկրորդ պլան, երբ կա անվտանգության հարց:
–Ես չեմ կարծում, թե նման երևույթ առկա է: Նման պարագայում մոբիլիզացվելը ցանկացած նորմալ պետության մեջ դրական երևույթ է, բայց եթե սա չխթանի մեր քաղաքական այրերի վարքագիծը տնտեսության մեջ, ներքաղաքական կյանքում…Վերջապես այն, ինչ այսօր տեղի է ունենում գոնե վերջին 1 տարվա ընթացքում ամբողջ համաշխարհային ասպարեզում, ցույց է տալիս մեկ բան, որ գերտերությունների համար մեր պետությունների նման պետությունները այդ դաշտերն են, որտեղ նրանք իրենց փորձերն են անցկացնում:
Աստված մի արասցե, եթե ոմանք մտածեն, որիշխանությունը կարելիէ պահել այդ գնով՝ ստեղծել նմանատիպհակամարտություններ, ասել՝ պատերազմն առջևում է, և փորձեն դրանով ուղղակի իշխանություն երկարաձգել: Ես կարծում եմ, որ սա անպտուղ պահվածք կլինի:
–Գուցե նման սցենար լինի ընդդիմադիրների կողմից. երբ նախորդ ընտրություններից հետո ԲՀԿ-ն նորից դարձավ կոալիցիայի մաս, հայտարարեց , թե կա Ղարաբաղի հարց, իսկ այն ժամանակ իրավիճակը դեռ այսքան լարված չէր:
–Բացառվում է նման բան շատ պարզ պատճառով. գալիս է մի սահման, որից այն կողմ հենց այդ նույն անվտանգությունն ապահովելու համար երկրի տնտեսական վիճակը պետք է բարվոք լինի: Անընդհատ շահարկելով անվտանգության խնդիրը՝ անելով գործողություններ, որոնք արդեն վաղը անշրջելի կդարձնեն Ղարաբաղյան խնդրի կարգավորման հարցում մեր կորուստները՝ արդեն վտանգավոր է: Այն ժամանակ մենք դեռ այս սոցիալ-տնտեսական շեմին չէինք հասել, հիմա Հայաստանը դատարկվում է:
Հարցազրույցն ամբողջությամբ՝ մեր տեսանյութում: