Վարչապետ Հովիկ Աբրահամյանը համաձայն չէ ընդդիմադիրների քննադատությանը, թե օրերս Ծաղկաձորում գործարարներին ստվերից հարկային դաշտ բերելու համար լրացուցիչ ժամանակի անհրաժեշտության մասին խոսելը նահանջ է:
Հիշեցնենք, որ Հովիկ Աբրահամյանը, «Բազե» երիտասարդական հավաքի ժամանակ անդրադառնալով երիտասարդներից մեկի՝ ստվերի դեմ պայքարի հարցին, ասել է. «Դուք ասում եք, որ ես ասել եմ՝ ստվերի դեմ պայքարում ենք, ես կախարդական փայտիկով խփելու եմ, բոլորը գալու են հարկային դաշտ։ Ո՛չ, դա ֆինանսական կորուստ է մարդկանց համար, նրանք իրանց ֆինանսներից դժվար են բաժանվում, հիմա այդ դժվարությունը հաղթահարելու համար ժամանակ է մեզ պետք»։
«Ին՞չ է, որ մենք ասում ենք՝ ժամանակ է պետք, ուրեմն ձախողե՞լ ենք: Դուք ճիշտ չեք հասկացել: Ես ասել եմ, որ հուլիսի 1-ից մենք պետք է աշխատենք միասին, և հոկտեմբերի 1-ից մեր շրջանառության հարկը 3,5 տոկոսից դառնում է 1 տոկոս, և փաստաթղթավորումը պարտադիր է դառնում բոլորի համար: Հիմա մենք աշխատում ենք, և ֆինանսների նախարարությունը տալիս է համապատասխան հաշվետվություններ:
Ինչ վերաբերում է իմ ասածներին, ապա դա վերաբերել է նրան, որ մենք միանգամից ոչինչ չենք կարող անել, ժամանակի ընթացքում գնալու ենք և ստվերը նվազեցնելով՝ դարձնելու ենք մինիմում, դա փաստ է»,- ՀՀԿ ԳՄ նիստից առաջ պատասխանելով «Առաջին լրատվական»-ի հարցին՝ ասաց Հովիկ Աբրահամյանը:
Վարչապետը, խոսելով անցած 100 օրերի ընթացքում կատարված աշխատանքից, ասաց, որ այդ 100 օրը ոչ մի բան չասող գաղափար է, և դա պետք է հանել: «Մենք 100 օրով չենք բավարարվելու: Մենք շարունակական, հետևողական աշխատելու ենք»:
Լրագրողները Հովիկ Աբրահամյանից հետաքրքրվեցին, թե ի՞նչ կարող է Հայաստանն առաջարկել ռուսական շուկային, և ինչպե՞ս է կազմակերպվելու այդ գործընթացը: Վարչապետը նկատեց, որ 2 օր առաջ բոլոր գործարարներին հավաքել է, և քննարկել են հնարավոր տարբերակները: Պայմանավորվել են փորձել մեր ապրանքներն արտահանել ՌԴ: «Ես մեր ռուս գործընկերներին ասել եմ, որ մենք՝ որպես կառավարություն, պատրաստ ենք ձեզ աջակցել ինչով հնարավոր է»,- ասաց վարչապետը: Մեր դիտարկումը, թե եթե մենք ինքներս բանջարեղեն և այլ ապրանքներ ներկրող երկիր ենք, ի՞նչ կարող ենք առաջարկել ռուսական շուկային, վարչապետն անպատասխան թողեց և արագ հեռացավ ԳՄ նիստին: