Այսօր ավարտվեց Եվրոպական միության ֆինանսավորմամբ «Թֆինինգ» երկամյա ծրագիրը, որի նպատակը թարգմանչական ոլորտի կարողությունների ամրապնդումն էր: Արդարադատության նախարարությունն ունի թարգմանչական կենտրոն, որը հիմնականում զբաղվում է իրավական նորմատիվ ակտերի թարգմանությամբ, իսկ այս ծրագիրը ուղղված էր հենց այդ կենտրոնի բարելավմանը:
Ծրագրից զատ՝ «Առաջին լրատվական»-ը նախարարից հետաքրքրվեց Քրեակատարողական վարչության պետ Հայկ Հարությունյանի պաշտոնանկության և նրա հավանական փոխարինողների մասին: Նախարարը, սակայն, շարունակեց պնդել, թե Հայկ Հարությունյանն ազատված չէ աշխատանքից, այլ պարզապես ժամանակավորապես բացակայում է:
Ինչ վերաբերում է «Նուբարաշեն» ՔԿՀ-ի նորանշանակ պետին, որը ոստիկանության համակարգից է, նախարարը նրա նշանակումը նորմալ է համարում:
«Եթե վիճակագրություն կատարենք, ապա քրեակատարողական համակարգում բավականին ստվար զանգված ծառայողներ կան, ովքեր տեղափոխվել են ոստիկանությունից: Ընդհանրապես այդ հատուկ ծառայությունները՝ ոստիկանություն, ԱԱԾ, ՔԿ ծառայություն, դրանք ըստ էության հավասարեցված են, և դրա համար Հայաստանի օրենսդրությունը թույլ է տալիս, որպեսզի համապատասխան տեղաշարժեր լինեն մի հատուկ ծառայությունից մեկ այլ հատուկ ծառայություն: Ինչ վերաբերում է արդյունավետությանը, ապա ժամանակը ցույց կտա»,- ասաց Հովհաննես Մանուկյանը՝ հավելելով, որ նույն ՔԿ վարչության պետ Հայկ Հարությունյանը ոստիկանության համակարգից է:
«Առաջին լրատվական»-ը նախարարից հետաքրքրվեց նաև, թե կատարե՞լ է վարչապետի հանձնարարականը, որը վերաբերում էր քաղաքացիական հասարակության գործողություններին:
«Դա ոչ թե քաղաքացիական հասարակությանն էր վերաբերում, այլ վերաբերում է հանրային կերպարների պաշտպանվածության մեխանիզմին: Այդ ուղղությամբ մենք աշխատանքներն ավարտել ենք և մոտ ժամանակներս մեր եզրակացությունը կներկայացնենք կառավարությանը»,- ասաց նախարարը՝ չմանրամասնելով, թե այդ եզրակացությունը օրենսդրական նախաձեռնությա՞ն տեսքով է, թե՞ այլ:
Հիշեցնենք, որ Հովիկ Աբրահամյանը արդարադատության նախարար Հովհաննես Մանուկյանին նման հանձնարարական էր տվել այն բանից հետո, երբ կուտակայինի դեմ պայքարի ակտիվիստները մետաղադրամներ էին նետել պաշտոնյաների ուղղությամբ, որը վարչապետի կողմից մեկնաբանվեց որպես իշխանության ներկայացուցիչներին նվաստացնելու փորձ:
«Ես անընդունելի եմ համարում ամբոխային մեթոդներով իշխանության ներկայացուցիչներին նվաստացնելու և ճնշելու փորձերը, ինչպես, օրինակ, պատգամավորների կամ նախարարների վրա մանրադրամների նետումը: Թերևս ոմանք մոռացել են, որ իշխանության ներկայացուցիչները ևս ունեն մարդու բոլոր իրավունքներն ու ազատությունները և ենթակա են պաշտպանության նույն ձևով, ինչ հասարակության ցանկացած անդամ: … Ուստի արդարադատության նախարարին ու ոստիկանապետին հանձնարարում եմ քննարկել այս հարցը և առաջարկել լուծումներ թե՛ օրենսդրական, թե՛ կազմակերպչական»,- ասել էր Հովիկ Աբրահամյանը: