«Կարեն Պետրոսյանի դիակը պետք է օր առաջ բերվի Հայաստան, քանի որ շատ կարևոր է, որ մինչև դատաբժշկական փորձաքննությունը հետքերը չվերանան»,- լրագրողների հետ հանդիպման ժամանակ ասաց «Ընդդեմ իրավական կամայականությունների» ՀԿ նախագահ, ՀՀ Մարդու իրավունքների նախկին պաշտպան Լարիսա Ալավերդյանը՝ հավելելով, որ Ադրբեջանում Կարմիր խաչի ներկայացուցչությունը վախվորած վիճակում է, ավելին անել չի կարող, ուստի Հայաստանի Կարմիր խաչն էլ առավել օպերատիվ աշխատել չի կարող:
Ըստ Լարիսա Ալավերդյանի` այս պահին միջազգային իրավունքը անտեսվում է. «Հայտնվել ենք պղտոր վիճակում. Ադրբեջանն ուզում է այստեղ իր ձուկը բռնել, միջազգային իրավունքի փոխարեն՝ քաղաքական շահերով են հիմա առաջ շարժվում»: Լարիսա Ալավերդյանի խոսքով` Հայաստանը առաջինը պետք է ճնշում գործադրի ԵԱՀԿ Մինսկի խմբի համանախագհների վրա: «Սահմանային միջադեպերի հետազոտություն չի իրականացվում, մի տեսակ արհամարհանք և պայծառատեսություն կա գործընթացում»,- ասաց նա:
Տիկին Ալավերդյանը նաև ընդգծեց, որ զարմանում է` Հայաստանը հարցը ինչպե՞ս չի միջազգայանցնում՝ իր ձայնը բարձացնելով, ինչու չէ, ԵԽԽՎ-ում, ՄԱԿ-ում, տարբեր հարթակներում. հնարավորություններ շատ կան, «պասիվության մատնվելով՝ հաջողության չենք կարող հասնել»:
Նախկին ՄԻՊ-ը նշեց նաև, որ արտաքին գործերի նախարարությունը ևս պետք է հստակ հայեցակարգ ունենա, ինչը չկա: Առհասարակ, ըստ նրա, արտաքին դոտկտրինը ոտքից գլուխ սխալ է, և այսպիսի իրավիճակ է արդեն 20 տարի:
Լարիսա Ալավերդյանի կարծիքով՝ հիմա գլոբալ խաղ է, «այս պարտիայում շահել է ՌԴ-ն. Ռուսաստանին հաջողվեց ապացուցել, որ տարածաշրջանում հզոր ազդեցություն ունի»: Ըստ նրա` հետաքրքիր էր նաև այն, որ այս փուլում Մեծ Բրիտանիան ևս միջամտեց` խոսելով սահմանային միջադեպերի մասին: «Բրիթիշ պետրոլիումը չի թողնի, որ պատերազմ լինի»,- ասաց նա:
Լուսանկարը` PanARMENIAN Photo-ի